HUMAN sa upat ka maiden flights nga niabot sa gipanindot nga Bantayan Airport kagahapon, Nobiyembre 27, giklaro sa kadagkoan sa Mactan-Cebu International Airport Authority (MCIAA) nga wala pay commercial flights sa maong tugpahanan.
Matod sa General Manager sa MCIAA nga si Atty. Steve Dicdican nga dili matawag nga inaugural flight ang mga chartered flights sa mga partisipante sa Suroy-Suroy Sugbo SMB (Santa Fe, Madridejos, Bantayan) Escapade.
"Dili pa na sya inaugural flight, it was really to promote travel in the new tourism normal," asoy ni Dicdican.
Dugang pa ni Dicdican nga kumpletuhon pa ang mga kuwang sa Bantayan Airport usa kini modawat og commercial flights.
"Ang inauguration ani will come in the later date when ma completed totally ang construction works," asoy ni Dicdican.
Ang Bantayan Airport nga i-operate sa MCIAA adunay 1.2-kilometer runway diin mamahimong makatugpa ang mga turbo prop nga klase sa eroplano.
Gisugdan kagahapon ang unang adlaw sa Suroy-Suroy Sugbo SMB Escapade nga proyekto tali sa Cebu Provincial Government, MCIAA, ug Department of Tourism-Central Visayas.
Ang matag lungsod sa Isla sa Bantayan nipahigayon og nagkadaiyang welcome ceremony alang sa mga turista diin ilang gipasigarbo ang ilang kultura ug lokal nga mga pagkaon. (NDT)