SUPERBALITA CEBU

Madridejos mayor: Padayon among pagprotehir sa publiko batok Covid-19

CEBU. Madridejos Mayor Salvador Dela Fuente. (Hulagway iya ni Nicko Tubo)

GIPASABOT ni Madridejos Mayor Salvador Dela Fuente nga padayon ang ilang pagpaningkamot sa pagprotehir sa mga residente sa lungsod batok coronavirus disease (Covid-19).

Kini human nag-viral sa social media kagahapon, Nobiyembre 27, ang mga hulagway sa Suroy-Suroy Sugbo SMB (Santa Fe, Madridejos, Bantayan) Escapade diin makita ang mainitong pagdawat sa mga Lawisanon sa maong kalihukan nga gihulagway sa mga netizen nga nakalapas sa social distancing policy.

"Kadto man gud nga event di man gud ta kapugong sa ilang eagerness nga makakita sila og mga taga laing nga lugar, mga bisita," asoy ni Dela Fuente kinsa nakig-atubang sa mga sakop sa media Sabado sa buntag, Nobiyembre 28.

Matod sa pangu sa Cebu Provincial Tourism Office nga si Maria Lester Ybañez nga dagsaon gayud sa mga tawo ang matag Suroy-Suroy hilabi na kon naa si Gobernador Gwendolyn Garcia.

"If you've been with her, anywhere she (governor) goes mao gayud na among problema, dumugonun gayud siya," asoy ni Ybañez.

Giklaro usab ni Dela Fuente nga wala nila gi-require nga magsul-ob og uniporme ang mga tinun-an nga nakita sa mga hulagway nga nag-viral sa social media.

Dugang pa niini nga wala usab face-to-face nga klase sa lungsod.

"Naanad nana sila among mga studyante diri pag once nga may Suroy-Suroy mo-welcome gayud na sila sa dalan," asoy ni Dela Fuente.

Nagpasalamat ang mayor sa kabalaka nga gipakita sa mga netizen alang sa mga residente sa lungsod.

"Hinuon medyo concern gayud sila, nagpasalamat ko sa ilang concern," asoy ni Dela Fuente.

Giabisuhan sa mayor ang mga residente nga nitambong sa kalihukan kagahapon nga magtuob o muinom og luy-a.

"Since pagsugod sa pandemic mao na gayud nay advisory namo," dugang pa sa opisyal.

Gibutyag usab sa mayor nga usa nalang ang nagpabiling aktibong kaso sa Covid-19 sa lungsod ug taudtaod na nga walay natalang bag-ong kaso.

"Mga 8 or 10 days ba wala na mi kay ang bag-o namo nga result nga 41 nga bag-ong gi-swab ang tanan negative man," asoy ni Dela Fuente.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph