SUPERBALITA CEBU

2 ka gikatahapang NPA nadakpan sa Cebu

Hulagway tampo sa Regional Mobile Force Battalion Central Visayas

DUHA ka gikatahapang mga miyembro sa New People's Army (NPA) nga dunay mga warrant of arrest nadakpan samtang laing duha nitahan sa Regional Mobile Force Battalion (RMFB) Central Visayas sa lungsod sa Dumanjug ug sa Liloan, probinsya sa Sugbo.

Ang mga suspetsadong mga rebeldeng komunista nga sila si Raymond Callora, 23, lumad nga taga Barangay Trinidad, Guihulngan City, Negros Oriental ug si Antonio Amparado Jr., 37, taga Guihulngan gihapon, apan kasamtangang, nagpuyo sa Dumanjug, Cebu.

Gikompirmar ni Police Lieutenant Elmond John Mondaya, acting company commander sa 703rd Mobile Company ubos sa RMFB-Central Visayas, nga ang duha mga miyembro sa Communist Party of the Philippines-NPA nga gipangita sa korte sa kasong murder sa pagpatay sa usa ka sakop sa Citizen Armed Force Geographical Unit (Cafgu) member sa Negros Oriental niadtong Marso 2017.

Ang duha adunay warrant of arrest gikan sa Branch 64 sa Regional Trial Court sa Guihulngan nga gipirmahan ni Judge Mario Trinidad niadtong Hulyo 2019 dihang naa pa sa serbisyo.

Matod ni Mondaya nga sukad niadtong nilingkod siya isip commander sa Septiyembre, gisugdan na dayon nila ang pagpangita sa mga NPA nga dunay warrants.

Tungod kay atbang ra ang Negros ug Cebu, sila si Mondaya nagtuo nga dinhi na kini ningtago sa Cebu human sa insidente.

Niadto lang Nobiyembre 23, nakakuha sila og intelligence report nga si Callora nitambong og lubong sa St. Anthony de Padua Cemetery sa lungsod sa Liloan.

Girespondehan dayon sa ilang tropa ug didto nakit-an nila si Callaro ug gidakop dayon.

Samtang, niadtong Nobiyembre 26, nakadawat sila og laing intelligence report nga anaa si Amparado sa Sitio Tambis, Barangay Panlaan Gamay, Dumanug, Cebu diin siya temporaryong nagpuyo.

Dali dayon giadto nilang Mondaya ang lugar ug gipresentar ang iyang warrant of arrest.

Ang duha anaa sa kustodiya sa RMFB-Central Visayas, samtang di pa ihatod sa korte sa Guihulngan, Negros Oriental diin gikan ang maong mga warrant of arrest.

Sa laing bahin, duha ka laing nagpaila nga mga miyembro sa NPA ang ni-surrender sa buhatan sa RMFB-Central Visayas dala ang ilang mga di lisensyadong armas niadtong Nobiyembre 22, 2020.

Mga ngan sa duha gipugngan ning mantalaan alang sa ilang seguridad.

Matod ni Mondaya nga ang duha nibalik na sa sabakan sa gobyerno tungod sa pandemya ug mas naglisod na sila og palit og pagkaon ug pagpangita og kapuy-an.

Usa kanila nisaad nga motabang sa kagamhanan sa pagpatahan sa ilang mga kauban. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph