Editoryal: Husto si Garcia

DUNA karoy panawagan sa face-face-to face nga klase, labina sa lalawigan sa Sugbo. Si Gobernador Gwendolyn Garcia dugay nang mapanagan-on sa pagkalawat sa way face-to-face nga klase tungod kay nasayod siyang way makatupong sa atubangay nga pagtudlo.

Andam siyang mopalit og mga libro, apan di siya buot mopalit og modules kay alang niya, kwestyonable ang uban niini kay nakamugna og mga kalibog sa mga ginikanan ug mga bata. Nagbaha ang mga saway niini sa social media.

Husto ang baruganan ni Garcia nga mas maayong ibalik ang face-to-face nga klase sa mga dapit nga ubos kaayo ang mga kaso sa coronavirus disease o kadtong zero na gyud. Nganong di man tuod ibalik ang atubangay nga klase ning mga dapita?

Huna-hunaa lang gud, nganong gitugot man ang pagbukas sa mga mall ug mga simbahan nga mas daghang mga tawo ang nagtapok kay sa mga tunghaan nga naa sa hilit nga mga dapit nga mas luwas gikan sa Covid-19?

Mas luwas ang mga tunghaan nga naa sa hilit itandi sa mga simbahan ug malls kay sagad kanila, naa ra sa ilang dapit nagpundo ang mga tawo. Sulagma na kaayo nga dunay dayo nga mahasum-ok.

Sa hilit nga mga dapit, sayon usab ang pag-monitor sa mga estranyo. Wa man gani matago nga sekreto kay nag-ilhanay ra ang mga tawo.

Daghan sa mga ginikanan sa hilit nga mga lugar kuwang sa edukasyon. Ang uban busy sa panginabuhi hinungdan nga ang mga anak mabiyaan sa ilang pagtuon ug way makagiya.

Kaanugon sa panahon nga way makat-unan.

Bisan ang regional office sa Department of Education (DepEd) nasayod na niini. Sayon ra kining mapangandaman uban sa partisipasyon ug suporta sa mga komunidad.

Hinaut nga ang kadagkuan sa kagamhanan magpa face-to-face sa klase.