ANG National Basketball Associations (NBA) nipahibawo na sa ilang mga duwa atol sa pre-season game nga sugdan sa Disyembre 12 hangtod Disyembre 20.
Base sa maong schedule, adunay 49 ka mga duwa ang ipahigayon apan ang NBA nibutyag nga aduna pay posibleng mausab depende sa sitwasyon nga pagasalmotan sa 30 ka mga team.
Lima ka duwa ang ipahigayon sa Disyembre 12 nga maoy opening day.
Ang preparasyon sa pre-season gitinguha nga maminosan ang pagsige og biyahe diin ang teams moduwa kaduha sa ilang venue sa maong mga adlaw.
Sama pananglit sa Indiana Pacers kinsa mobisita sa Cleveland Cavaliers karong Disyembre 13, makigsakbang sa balwarte sa ilang karibal sa division paglabay sa duha ka adlaw.
Ang Los Angeles Lakers ug Clippers kinsa nagsawo og korte sa Staples Center nakabintaha sa sitwasyon sanglit dili na sila motabok og laing estado.
Ang NBA nipahibawo nga ang 2020-2021 regular season gikatakdang magsugod karong Disyembre 23 base sa report sa ni Andrew Lopez sa ESPN.
Sama sa gipaabot, ang sunod nga season gikan sa 82 ka duwa, karon gihimo nalang sa NBA og 72 ka duwa. (PAC)