LABING siguro daghan ang manguryuso sa away (Dominggo sa Pilipinas, Sabado sa gabii didto sa Amerika) tali ning duha ka edaran ug mga kanhi inilang boksidor sa tibuok kalibutan nga sila si Mike Tyson ug Roy Jones Jr.
Kon unsay ikadalit ning duha ngadto sa publiko ilabi na sa mga boxing fans kini maoy atong maaninaw sa dihang mosaka sila ibabaw sa ring sa Staples Center sa Los Angeles, California.
Pero hangtod ning pagsulat, dili pa gyud matino ang mga lagda nga sundon ning awaya sanglit dunay provisions nga giluwatan ang California State Athletic Commission nga naghatag usab og proteksiyon sa 54-anyos nga Tyson ug sa 51-anyos nga Jones.
Alang sa CSAA nga kini usa lang ka exhibition match nga langkuban sa walo ka round. Bisan tuod og walay headgear, apan 12 ounces nga gloves ang gamiton niini ug imbis tres minutos kunhoran ngadto sa dos minutos lang ang matag round.
Sanglit kay usa man ka exhibition match, walay ideklarar nga winner ug kinahanglan nga dili sila mo ambisyon og knockout nga kadaugan.
Si Andy Foster, executive director sa CSAC, mibutyag nga purely entertainment lang gyud kuno ni ug gani undangon kini kon dunay magisi-an og dugo nga modagayday.
Pero dako kining sukwahi sa gipamahayag ni Tyson ug Jones kinsa pulos na nagbinaharay.
Daw og sa dili komportable ang duha sa maong rule. Hasta pod ang World Boxing Council (WBC) nga maoy sanctioning body sa nahisgutang promotion.
Gipasabot sa WBC nga duna gani silay ihatag nga title og bakus ngadto sa modaog. Aduna na usay gipang-assign nga mga judges.
Sa niaging adlaw gipahibawo sa WBC nga usa gyud kini ka tinud-anay nga away ug duna gyuy moguwang mananaog.
Sa tinimbangay, mipatong si Tyson sa weighing scale nga may 220 pounds samtang 210 lbs. ang kang Jones.
Edaran na man tuod apan himsog tan-awon kon itandi sa ilang mga ka-edad. Preparado ug sakto usab sa kondisyon.
Si Tyson (50-6, 44 KOs) wa na makaaway sulod sa 15 ka tuig ug kini maoy usa sa mga rason kon nganong gihigpitan sa CSAC ang ilang mga provisions.
Dinhi nabintahaan siya ni Jones (66-9, 47 KOs) kinsa nakaaway pa niadtong 2018. Nanganti si Jones nga gawas sa iyang tinguha nga ma-knockout si Tyson, andam ug tagana usab siyang mosugal sa iyang kinabuhi ibabaw sa ring.
Sa gikaingon ko na sa unahan, nga daghan ang manguryuso sa pagtan-aw niini kay pulos gud ni mga sikat ug world champions sa ilang panahon, pero kon di gani maklaro kon unsay lagda ug rules nga sundon, labing siguro mosangko na usab ngadto sa laing kontrobersiya.
Pero ang nakapadugang sa kaikag ning maong promotion mao kining away ni Nate Robinson, ang kanhi sikat nga NBA player kinsa katulo mamahimong slam dunk champion. Si Robinson makigsinukliay sa iyang kinumo batok ni Jake Paul sulod sa unom ka round.
Talagsaon ning gihimo ni Robinson kinsa nakaduwa og 11 ka tuig sa NBA ubos sa New York Knicks, Boston Celtics, Oklahoma City Thunder, Golden State Warriors, Chicago Bulls, Los Angeles Clippers, Denver Nuggets ug New Orleans Pelicans.
Gikan sa pagka professional basketball player karon professional boxer na sab. Dinhi sa atoa, duna say susama sa ingon ani, apan nabali. Gikan sa pagka professional boxer unya nahimo usab nga professional basketball player. Pangutan-a ninyo si Manny Pacquiao, di ba tinuod ni. (jun.migallen22@gmail.com)