SUPERBALITA CEBU

Vallena: Kaluwasan

Pedal

HAPIT na mag-usa ka dekada sukad ko gitugtan sa among editor-in-chief, Michelle So, sa pagsuwat ning akong column alang sa akong adbokasiya sa biseklita ug road traffic safety. Akong prayoridad sa paghisgot ang kabahin sa biseklita nga luwas, apil na ang trapiko. Ang kaning duha sumpay og tinai kay di ka makahisgot kalabot sa luwas nga pagbiseklita nga di mo hisgutan ang luwas nga kadalanan.

Magabii na mi mahuman sa akong asawa sa among trabaho. Sa karsada, nga karon nagkadaghan ang nagbiseklita, daghan gihapon ko og nakit-an nga nag-bike nga way helmet ug way blinker. Kaning duha importante kaayo sa karsada sa lawom nga kagabhion.

Importante ni alang sa kaluwasan. Sa gabii, di ka hapit makita, labina kon nagsul-ob ka og dark nga mga sapot. Sa kagabhion, gawas nga di kaayo maayo ang kahimtang sa mga suga sa karsada, lahi na sab ang imong reflexes kay ang imong body clock alang na sa pagkatulog. Mao gani nga ang pagkahubog o pag-inom og alcoholic drink angay likayan.

Busa kon ikaw nagbiseklita, importante kaayo nga makita ka. Ang labing maayo nga paagi mao ang paggamit og blinkers. The more, the better, apil na sa imong helmet alang sa mas maayo nga visibility.

NGANO?

Sa gabii, lahi na ang imong reflexes kay ang lawas nangandam alang sa pagkatulog. Busa, ang imong perception o panan-aw sa karsada lahi na. Busa,ang panan-aw sa mga driver sa karsada, di na kaayo maayo.

Ang blinker maayo tungod kay sa mga pagtuon, mopa-alert ang blinking light sa driver sa mga sakyanan. Bisan tingali nagduka sa pagmaneho, ang pagkidlap kidlap sa suga mopa-alerto kaniya sa pagbantay kay naa sa unahan ang biseklita.

Nakasabot ko nga dunay ubang mga tawo nga maglisod sa kwarta. Apan ang kinabuhi priceless, way tumbas nga bahandi sa kalibutan. Busa, ayaw huna-hunaa ang kwarta, ang importante luwas ka sa mga disgrasya. Kon ikaw ang gisaligan sa imong pamilya unya simbako nadisgrasya samtang nagbiseklita, ang hinungdan nadasmagan ka kay way blinker, mag-unsa na lang ang imong pamilya?

Naghuna-huna ka sa presyo sa imong blinker, but wa ka maghuna-huna sa imong pamilya.

IRO

Ambot hangtod karon, suliran gihapon ang mga iro sa kadalanan. Di na hinuon grabe kaayo kon itandi sa pagsugod sa pandemic. Daghan gihapon ug kuyaw sa two-wheeled nga mga sakyanan, biseklita ug motorsiklo. Kadaghan na mi maigking sa akong asawa sa among pag-uli sa balay magabii. Kanang mga iro nga kalit lang molabang sa karsada. Maayo gani di ko tigkusog sa pagpadagan.

Ambot pila na kaha ka mga aksidente ang nahitabo tungod sa mga iro. Nakahinumdom ko, dunay nangailo nga mga bata nga taga Balamban kay ang ilang mga ginikanan nangamatay sa aksidente kay nakaligis og iro samtang nagmotorsiklo. Pila pa ka mga kinabuhi ang makalas sa pagpabaya sa hingtungdang mga ahensya sa kagamhanan?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph