Nanginahanglan og dugang nga mga doktor ug midwife ang Cebu City Health Department (CHD).
Si CHD officer-in-charge Jeffrey Ibones nibutyag nga aduna lay 32 ka mga doctor ang anaa sa CHD, 20 niini field doctors.
Matod ni Ibones nga ang husto unta nga gidaghanon sa mga doktor sa CHD 70 kabuok, 60 kanila unta i-assign isip field doctors.
Ang uban kay i-assign para mo-handle sa divisions ubos sa CHD, lakip na ang mga nagkalain-laing programa niini.
Matod ni Ibones nga ang 20 ka field doctors nagkupot lapas tag lima ka barangay health centers, apil na sa mountain barangays.
Ang ideyal nga ratio unta kay usa ka doktor mata 20,000 ka mga residente.
“Nya mayta ang health centers kay adjacent, but lagyo and naa pa’s bukid,” pasabot ni Ibones.
Matod ni Ibones nga mao ni rason kon ngano dili kada adlaw adunay doktor sa mga barangay health centers.
Matod ni Ibones nga maayo nga makalihok og iya ang barangay health centers tungod kay sila ang anaa sa “defense line” para di magdasok sa mga ospital ang mga pasyente, ilabi na karon nga adunay coronavirus disease 2019 (Covid-19) nga pandemya.
Sa concern sa mga midwife, matod ni Ibones nga ang ideyal nga gidaghanon kay 200, apan karon, aduna lay 90 kabuok.
Tungod sa pandemya karon, gamit unta kaayo nga adunay mga midwife sa mga barangay para di na moadto sa tambalanan ang mga manganakay.
MIHANGYO
Atol sa budget hearing para sa proposed 2021 annual budget niadtong Nobyembre 27, 2020, nihangyo si Ibones nga tugutan sila sa pag-hire og mas daghang doktor ug midwife.
Ang Council nisanong sa hangyo ni Ibones.
“The committee on budget will note that you’re requesting for a bigger budget for personnel services, considering that you will increase the number of doctors for next year,” matod ni Cebu City Councilor Raymond Alvin Garcia, kinsa chairman sa budget and finance committee.
Si Councilor Joel Garganera miingon sad nga kinahanglan gyud nga pun-an ang mga doktor sa CHD.
“Considering the pandemic, makita gyud nato nga there is really scarcity of doctors, nurses, and midwives,” ingon ni Garganera atubangan sa konseho.
“We should add personnel diha. If we want result, then let’s add personnel diha. If we want different result with the same personnel diha, forget it, we cannot have that result,” segun ni Garganera.
Si Garganera, kinsa deputy chief implementer sab sa Emergency Operations Center (EOC), niingon nga ang CHD anaa sa frontline sa dakbayan para di na mabalik pa ang pagka-overwhelmed sa mga ospital sa dakbayan.
Matod ni Ibones ang anaa sa P200 million ang gi-propose niya nga budget para sa peronnel services, labot na ang mga barangay health workers.
Sa 2021 annual budget, adunay proposed P580 million niini nga alangs a CHD.
Ang executive department nisumiter sa ilang proposed nga budget nga nagkantidad sa P10.8 billion ngadto sa konseho.