MIRATSADA gyud og maayo ang Singko. Way kabutangan sa mga programa ang atong nuntan dinhi.
Nagsugod sa mga game show, talk show noontime show, reality, variety ug komedi karon naa pay daghang nadungag.
Gisugdan na sab nila ang ilang primetime bida nga atong sundan matag gabii, una sa tanan dili nako mahimong dili ipasigarbo ang unang Christmas serye grabe sab ning obra ni Direk Jun Robles Lana unang semana pa lang puno na sa tensyon ang mga eksena dinhi.
Kon akoy pasultion kinahanglan gyud nimo tutokan ug wa kay sipyaton sa mga eksena dinhi gikan Lunes hangtod Biyernes para masundan ug masabtan nimo ang sugilanon sa “Paano Ang Pasko.”
Matag gabii may mga bug-at nga eksena nga makita ug sa aktingan, dili palupig ang matag usa sa cast sa maong serye gikan sa mga beterano ngadto na sa mga batan-on.
Human sab sa maong serye nagkadaiyang sugilanon imong nuntan matag gabii. Pili lang ka kon unsay imong gusto may romantic drama sa Lunes, romantic comedy sa Martes, aksyon fantasy sa Miyerkules, suspense thriller sa Huwebes ug Horror sa Biyernes depende unsay imong feel nga sundan dinhi.
Kon follower ka sa TV5, siguro nakita na ninyo ang mga bag-ong programa nga gisugdan miaging semana.
Matag Lunes sugilanon sa duha ka magsuon ang “Ate Ng Ate Ko” bida dinhi silang Kris Bernal, Isabelle de Leon, Jake Cuenca ug Joem Bascon may pagka-drama lovestory kini.
Martes, komedi ang dating ini nga may light romance ang “Stay In Love” nilang Maris Racal ug Kokoy de Santos, unang episode pa lang riot na sa katawa ang mga eksena dinhi.
Miyerkules, puno sa aksyon nga may fantasy ang manuntan nato ug bidang-bida dinhi si Ryza Cenon kauban isip “Bella Bandida,” silang AJ Mulach, Lito Pimentel ug uban pa.
Sa Huwebes usab kulbahinam ang imong masinati dinhi sa “Carpool” kay suspense thriller ang istorya nga imong masundan. Mahitungod sa makuyaw nga pagsakay nga dili nimo ka-ila ang driver ug uban pang kauban sa sakyanan.
“Kagat Ng Dilim” matag Biyernes puno sa kahadlok ug makapanlimbawot sa balhibo ang mga sugilanon nga imong tutokan dinhi.
Sa kadaghang mga bag-ong programa sa Singko, ikaw na lang ang bahala kon unsay imong tan-awon ug dili sipyaton sa pagsunod niini.
Sa akong bahin nakita na nako ang tanan pero ang ginuntan gyud nako mao ang “Masked Singer Pilipinas,” kay excited kaayo kang masayod kon kinsa ang singer nga nagpaluyo sa mga maskara.
Matag Dominggo usab ang “I Got You” nilang Beauty Gonzales, RK Bagatsing ug Jane Oineza, curious sab kong mahibaw-an kon may relasyon ba gyud sa tinuod nga kinabuhi silang Jane ug RK?
Ang Koreanovela usab nga “Wok Of Love” bisag gabii na kaayo kini lingaw kaayo kong nagsunod ini.
Ang bag-o nakong gitutokan syempre ang Christmas serye nga “Paano Ang Pasko” gawas nga umaatikabong aktingan ang atong makita adunay mga pang-gulat ug init nga mga komprontase nga dili nimo mahimong palabyon matag gabii, sulong mga Kapatid, Ay’g saba!