GIPASIDAN-AN sa amahan a Matanao, Davao del Sur ang drayber ug operators sa mga traysikel o motorized pedicabs nga dili mopadagan sa national highway.
Si Mayor Vincent Fernandez nagbutyag nga ang maong mando nanukad mismo sa Memorandum Circular No. 2020-036 nga gipaguwa sa Department of Interior and Local Government (DILG), pinitsahan niadtong Pebrero 27, 2020.
Nasayran nga luyo sa maong mando sa DILG, daghan gihapong traysikel ang nagadagan sa national highway.
Gumikan niini, si Fernandez nagmando sa mga sakop sa Matanao Municipal Police Station nga mag-deploy og mga personahe aron panakpon ang mga mosupak sa maong kamanduan.
Apan, sa silingang lungsod sa Bansalan, Davao del Sur, gibutyag sa mga nagpakabanang molupyo nga wa napatuman ang mando sa DILG ilabi pa nga sagad sa mga de-pasaherong trisikel padayong nagdagan sa Davao-Cotabato national highway.
Subay sa datos sa traffic section sa kapolisan, pipila ka mga trisikel na ang nahiagom sa disgrasya samtang nagdagan sa national highway sa maong lugar.
Hinuon, wa pa masayri kung kanus-a ipatuman sa lokal nga gobyerno ang taod-taod na nga direktiba sa DILG. (Orlando B. Dinoy)