PERSONAL nga bikil ang gituohang motibo sa kamatayon sa usa ka barangay pulis nga napalgang patay sa Purok 4 , Barangay Elizalde, Maco alas 8 sa buntag, niadtong Biyernes, Nobiyembre 27, 2020.
Ang biktima nailhang si Arnold Lobo, hamtong, ug barangay pulis sa Barangay Ngan sa lungsod sa Compostela.
Gibutyag nga ang biktima giila sa usa ka Albert Pedemente Pijo.
Base sa inisyal nga imbestigasyon, samtang usa ka mag-uuma nga taga Purok 4, Elizalde, kalit nga nadungog og sunod-sunod nga buto sa pusil diin sa pagsubay nakit-an ang biktima nga nagkadugong nalup-og.
Ang biktima nakahiagom og daghang samad pinusilan sa nagkadaiyang parte sa lawas nga miresulta sa hinanaling kamatayon.
Narekober gikan sa crime scene ang duha ka fired bullet, usa ka deformed fired bullet, duha ka fired cartridge cases ug usa motorsiklo.
Ang patay’ng lawas sa biktima gipahiluna sa Rosario Funeral samtang ang kapulisan padayong nag-imbestiga sa hitabo. (Dexter T. Visitacion)