PADAYONG giukoy sa kapolisan kinsa ang tag-iya sa dakong kantidad sa gituohang shabu nga nabangalan kilid sa baybayon sa Digos City, Davao del Sur atol sa ilang pagpatrolya alas 4:38 sa hapon niadtong Byernes, Nobiyembre 27, 2020.
Sumala ni Lieutenant Colonel Vici Anthony Tababa, hepe sa Digos City Police Station (DCPS), mihimo og coastal patrol ang iyang mga ginsakpan didto sa Sitio Biao, Barangay Cogon, dihang narekober ang usa ka kolor pula nga back pack.
Sa paghiling sa mga otoridad, nasuta nga aduna kini sud nga pipila ka sa ilegal nga druga ug mga paraphernalia sa paghithit niini.
Matod ni Tababa nga ang usa ka jumbo nga pakite aduna’y gibug-aton nga 37.7 gramo nga mobalor sa P256,000.
Laing dako nga pakite sa druga sab ang anaa sa sulod sa bag nga aduna’y timbang nga 10.9 gramo ug mobalor sa P74,120 diin ang tanan mototal sa P330,120.
Gituohan nga gianod ang maong bag sa baybayon.
Sa hitabo, dakong ang tanghaga sa kapolisan kon kinsa ang tag-iya sa maong bag sanglit wa’y bisan usa nga timailhan kon kang kinsa ang ilang narekober.
Anaa na sa Provincial Crime Laboratory Office ang mga narekober nga druga samtang padayon ang gihimong imbestigasyon sa kapolisan sa dapit.