ANG pambato nga guard sa TNT Tropang Giga nga si Ray Parks Jr. mao ang ga-una karon alang sa individual award sa PBA Season 45 Philippine Cup nga giduwa sulod sa “bubble” didto sa Angeles, Pampanga.

Galabaw si Parks nga adunay 38.3 statistical points sa iyang average nga 22.5 puntos, 8.1 rebounds, 3.1 assists ug 1.3 steals.

Si Parks maoy migiya sa Tropang Giga aron lupigon ang Phoenix Super LPG Fuel Masters sa sudden-death Game 5 sa semifinals niadtong Biernes aron dalhon sa PBA Philippine Cup Finals ang TNT.

Mao kini ang unang higayon nga nakasulod ang TNT sa Philippine Cup championship sulod sa pito ka tuig.

Ang gasunod ni Parks sa MVP race mao si Calvin Abueva sa Phoenix. Si Abueva adunay 37.1 statistical points gikan sa iyang average nga 15.4 puntos, 11.3 rebounds, 5.2 assists ug 1.7 steals sulod sa 12 kaduwa. Si Abueva nabalik lang karon nga season gikan sa iyang 16-month nga indefinite suspension.

Anaa sa ikatulong pwesto si CJ Perez nga adunay 35.7 statistical points, samtang si Matthew Wright natagak sa ikaupat nga pwesto nga adunay 35.6 statistical points, ug si Christian Standhardinger of NorthPort anaa sa ikalima nga pwesto nga adunay 34.6 puntos.

Si Wright mao unta ang gauna sa MVP race apan limitado na ang time niini batok sa TNT tungod sa ankle sprain.

Ang upat sa rival ni Parks alang sa MVP race pulos na-eliminate na sa PBA “bubble.” Mao nga hayag na nga maadto gyud kang Parks ang maong individual award.

Niining pagsuwat, gaduwa pa ang TNT ug Barangay Ginebra Gin Kings sa Game 1 sa ilang best-of-seven championship series.

Sa laing bahin, si Roosevelt Adams sa Terrafirma ug Aaron Black sa Meralco maoy gailog alang sa Rookie of the Year award. Bentaha si Black niini kay naabot man sa semis ang Meralco.