ANG international ug award-winning celebrity chef ug kolumnista sa Superbalita Cebu, Myke ‘Chef Tatung’ Sarthou milusad sa labing bag-o niyang cookbook, Simpol, niadtong Huwebes, Nobiyembre 26, 2020.
Si Chef Tatung, sa iyang virtual press conference nga giapilan sa mga journalist gikan sa lainlaing mga dapit sa nasod, niingon nga ang iyang cookbook mihimong sayon sa pagluto sa nagkadaiyang mga recipe.
“Matudloan ang mga Pinoy sa pagluto nga simpol, with varied ways of cooking,” pagpasabot ni Chef Tatung nganong giulohan og Simpol ang iyang bag-ong libro.
Matod niya, nga usa ka recipe, duna pay lainlaing mga recipe kun lainlaing mga paagi sa pagluto ug pagbutang og mga sagol.
“We have many recipes within a recipe,” dugang niya.
Iyang gihimong ehemplo ang inilang Pinoy dish nga kare-kare nga mahimong maluto sa lainlaing paagi ug recipe gamit ang mga sagol nga makita ra sa kusina.
“Kapag marunong kang magbasa, makuha mo,” pagklaro ni Chef Tatung kon unsa ka sayon nga basahon ug sabton ang iyang libro pinaagi usab sa paghan-ay sa mga sagol ug pagluto sa usa ka putahe.
MAKADANI
Ang nakaanindot sa iyang bag-ong libro sa pagpangluto kay mahimo kang makatan-aw sa video kon giunsa kini pag-andam.
Matag recipe, duna kini gibutang nga QR ug pinaagi sa pag-scan, imo nang masaksihan ang iyang video.
Matod ni Chef Tatung, iya kining gitumong alang sa mga batan-on nga mas ganahan og interactive, lahi nga paagi sa pagdani sa iyang readers.
NAKATABANG
Sa panahon sa pandemic, si Chef Tatung natandog sa estorya sa lainlain niyang mga follower sa social media nga nisulti kaniya nga dako kaayo siya og natabang
Iya kining nahimamat sa iyang mga lakaw. Usa ini magtutudlo nga wa nay income tungod sa mga quarantine, apan nakakitag panginabuhian pinaagi sa pagtan-aw sa Simpol videos sa social media ni Chef Tatung.
Matod niya, natandog kaayo siya sa ilang mga estorya.
Gipasabot ni Chef Tatung nga di siya magdinawo sa iyang kahibawo sa pagluto, gusto niya kining pasaw-an ni bisan kinsa nga interesado.
Wa siya magdahom nga ang iyang cooking lessons nakatabang og dako sa yanong mga tawo nga wa niya mailhi. Ang iyang bag-o ug ikaupat nga libro mapalit sa Shopee, Lazada ug National Bookstore sa tag P350 ang matag kopya. (REV)