MAYORGA, Leyte – Naluwas sa mga sakop sa Philippine National Police (PNP) sa Eastern Visayas ang unom ka mga bata sa usa ka cybersex den sa lungsod sa Mayorga, Leyte.
Ang mga bata nag-edad og 7 ngadto sa 17 anyos samtang nasikop ang 23 anyos nga suspek, nga gipugngan human kadugo ra usab kini sa lima ka mga biktima.
Base sa inisyal nga imbestigasyon, ang mga bata gipugos sa suspek nga mohimo og law-ay nga buhat sa internet bugti sa P5,000 nga salapi.
Nasayran nga tua sa abroad o gawas sa nasod ang mga kustomer sa suspek.
Tungod niini, ang kapulisan sa Police Regional Office (PRO) 8 ug Provincial Women and Children Protection Desk uban sa Women and Children Protection Center – Visayas Field Ofice ug Department of Social Welfare and Development (DSWD) ang nilusad dayon sa operasyon.
Nasakmit sa mga awtoridad ang mga ebidensya sama sa daghang sim ug memory cards ug cellphones nga gigamit sa cybersex operation.
Matod ni PRO 8 Director Brigadier General Ronaldo De Jesus, naa na sa kustodiya sa DSWD ang mga biktima samtang giandam na usab karon ang kaso batok sa suspek.
“It is bothering how some people exploit minor for some cruel purpose. Our children are to be loved and sheltered, not abused. I will see to it that the police force remains incessant against these violators who treat minors as their easy preys,” matod ni De Jesus.
Gisiguro sa kapulisan nga manubag ang mga tawo nga nalambigit sa samang binuhatan ug padayon pa ang ilang imbestigasyon niini.
Samtang, ang kaso batok sa mga suspek giandam na sa kapulisan. (JKDP)