ANDAM sila si Presidential Spokesperson Harry Roque Jr. ug Mayor Salvador Dela Fuente nga mopaubos sa imbestigasyon kalabot sa giingong kalapasan sa social distancing sa gipahigayong welcome ceremony sa Suroy-Suroy Sugbo sa lungsod sa Madridejos niadtong Nobiyembre 27, 2020.
Kini human gibutyag ni Department of Interior and Local Government Secretary Eduardo Año nga ilang imbestigahan ang maong hitabo.
“We will make sure na magkaroon ng fact-finding diyan at kung merong dapat managot ay titignan namin,” asoy ni Año.
NAG-VIRAL
Nag-viral sa social media ang mga hulagway sa welcome ceremony nga gipahigayon sa Madridejos Kota Park nga gitambongan ni Roque diin mihatag siya og speech.
Gihulagway sa netizens nga wala nasunod ang social distancing human makita sa mga hulagway nga gidagsa ang maong kalihukan sa mga residente lakip na ang mga bata.
Depensa ni Roque nga igo lamang siya giimbitahan sa kalihukan nga gipasiugda sa lokal nga kagamhanan ug wala siyay control niini.
“I was later informed, that the local official/s mentioned in interview/s that they did not expect the huge turnout of people as well,” pasabot niya.
Dugang ni Roque nga gipahimangnoan pa niya ang mga nitambong nga dili hubuon ang face masks aron luwas batok coronavirus disease.
Andam usab ang mayor sa Madridejos nga moatubang sa imbestigasyon ug giangkon niini nga wala na nila mapugngi ang mga tawo dihang nangabot na ang mga bisita.
“Unsaon man nato kay ato man gipugngan. In fact, gisirad-an man gani to nato ang gate ngadto sa Kota. Every now and then gakuan baya mi sa mga tawo nga social distancing. Dihang naabot na gayud ang mga bisita wala na gayud mapugngi,” asoy ni Dela Fuente.
TAWO MIDUGOK
Wa magdahom ang mayor sa kadaghan sa misaksi.
Dugang niya, “Unsaon man nato nga ang mga tawo didto man miagi sa baybayon. Actually basta Suroy-Suroy naman gud ni Governor Gwen ang mga tawo modumog gyud kay syempre motan-aw sad ni Governor labi na nga karon nagkuyog sila ni Secretary Dino, kuyog sila ni Secretary Roque. So mao to ang mga tawo ang ilang enjoyment nga makakita sad og taga Manila samot na gyud kay naa pa gyud taga Binibining Pilipinas.”
Matod ni Dela Fuente, bisan paman nagtapok ang mga tawo nagsul-ob gihapon kini og face masks.
“Pero makuan man nato ang mga tawo nga nag-mask man ikaduha sad nga beach man sad to didto,” asoy ni Dela Fuente.
Apan matod sa mayor nga dili na mausab ang maong panghitabo kon adunay susamang kalihukan nga ipahigayon sa ilang lungsod.
“Ato na gayud na i-implement na gayud ang medyo estrikto nga advisory nato sa mga tawo aron man sad malikayan. Next time dili nato mahitabo.” dason ni Dela Fuente.
SMB ESCAPADE
Ang Suroy-Suroy Sugbo SMB (Sta. Fe, Madridejos, Bantayan) Escapade nga gipahigayon niadtong Nobiyembre 27 hangtod sa 29 usa ka proyekto tali sa Cebu Provincial Government, Mactan-Cebu International Airport Authority (MCIAA), ug Department of Tourism-Central Visayas.
Nasubay ang maong kalihukan sa pagpasigarbo sa gipanindot nga Bantayan Island Airport ug pagbukas og balik sa turismo sa isla.
Apan matod ni MCIAA General Manager Atty. Steve Dicdican nga dili pa modawat og commercial flights ang maong tugpahanan sanglit gikinahanglan pa nga humanon ang mga kuwang sa maong pasilidad.
MANNY, JINKY
Sa laing bahin, imbestigahan usab ang kalihukan sa Batangas nga gitambongan ni Senador Manny Pacquiao diin nakita sa Instagram post sa asawa niini nga si Jinky ang pagdagsa sa mga tawo.
Matod sa Special Assistant sa senador nga si Jake Joson nga andam ang ilang kampo nga moatubang sa imbestigasyon ug giklaro niini nga nagsul-ob og face mask ug face shield ang mga nanambong sa maong kalihukan.
Giawhag ni Año ang mga opisyal sa gobiyerno nga likayan ang pagpahigayon og mga kalihukan nga makapatapok sa mga tawo diin dili na masunod ang health protocol. (NDT, ANV)