NIADTONG Sabado, Nobiyembre 28, nitambong ko sa ika-20 nga anibersaryo sa usa sa masanagon nga kahugpongan dinhi sa Sugbo, ang Association of Concerned Texters (ACT). Kinsay magtuo nga ang maong kahugpongan nagpangedaron na og duha ka dekada sa pagpangalagad sa katawhan. Mas naila sila sa pagtubag sa panginahanglan sa mga biktima sa katalagman pinaagi sa pagpakiglambigit sa mga dagkong kahugpongan ug foundation. Sama sa Bantay Bata 163, Sagip Kapamilya ug Lingkod Kapamilya niadtong mga panahon nga abli pa ang ganghaan sa ABS-CBN Central Visayas.
Ang dili nako malimtan nga labok sa maong grupo mao ang relief operations sa ABS-CBN human sa bagyong Yolanda niadtong 2013. Ang relief operations nilahos pa sa pagkasunod tuig, ang ACT maoy numero unong katambayayong paghagpat ug pagputos sa mga kinilong bugas, de latang sud-an, noodles, sinina ug mga gamit sa panimalay. Way kaluya nga ilang gipuno ang mga container van aron ma-deliver sa amihanang Sugbo, Leyte ug Samar.
Labihang kapuya ang maong tahas kay sa wala pa ang bagyong Yolanda, daan na silang gikulata sa daghang gimbuhaton human sa 7.2 magnitude nga linog nianang Oktubre sa samang tuig. Kadtong nakatunol og hinabang sa ABS-CBN booth sa Fuente Osmeña kaniadto, mao ni sila ang tigdawat sa inyong mga donasyon. Baynte ka tuig ang nakalabay ang teknolohiya sa pagpaambit og inpormasyon malambuon na kaayo pinaagi sa pagtuslok sa cellphone. Nadasig sa hagit nga giitsa ni komentarista Leo Lastimosa sa sibyaanang dyAB sa wa pa sirad-i ang ABS CBN, si Dongding Sabaldan maoy nangulo paghulma sa grupo.
Iyang sulti nako hilabihan ka kutas ang maong gimbuhaton sanglit lainlain man og propesyon, trabaho ug pinuy-anan ang mga nipadayag og interes nga magpasakop. Sa pangalan pa lang sa grupo hilabihan kabug-at ang ilang tagsatagsa ka responsibilidad.
Kining tanan nahiusa sa usa ka pagtuo nga ang pagtabang sa mga nanginahanglan maoy sentro sa inadlawng gimbuhaton. May mga outreach project sab sila nga padayong gimatutu ubos sa liderato ni Eric Redero ang ilang Presidente.
Sa video presentation nga giandam, makita ang dakong kausaban sa ilang mga pamayhon. Gani may mga kauban na sab sila nga tua na sa laing kalibutan. Nisaka man ang ilang pangedaron apan di kini makaapas sa pagsulbong sa ilang tagsatagsa ka pagbati ngadto sa nanginahanglan. Ang nakanindot sumala ni Eric kay nilungtad sila pinaagi sa ilang tagsatagsa nga paningkamot apil na ang pagkuot sa ilang kaugalingong bulsa sa mga galastohan nga gikinahanglan sa mga proyekto nga gipasiugdahan.