USA ka amahan misugo sa iyang anak sa pagsaka sa punoan sa mangga. Matod pas amahan, “Dong, sak-a ang mangga ug pislita ang bunga kon hinug na ba.” Ni-report ang anak, “Hinog na, Tay.” Tubag sa amahan, “Hala kanaog dong, kay akong kuhiton.”
Sa pag-ipo sa mga prutas, maayo gyud ang hinog sa punoan. Kadtong prutas nga pupuon ug pahinugon pa, kinahanglan nga sakto sa kaguwang. Kay kon ahat gani ang pag-ipo, di makagawas ang katam-is. Kon dili tab-ang, aslom.
Di prutas ang bag-ong napulo ka andana nga Cebu City Medical Center (CCMC) nga nibarog sa nahimutangan sa karaang building nga nagusbat sa linog niadtong Oktubre 15, 2013. Apan di kaha ahat ang pag-abli sa unang tulo ka andana niini sa Disyembre?
* * *
Gipahibawo ni Cebu City Mayor Edgardo Labella sa usa ka press conference niadtong Biyernes, Nobiyembre 27, 2020, ang pagbukas karong Disyembre sa unang tulo ka andana sa bag-ong CCMC.
Matod ni Labella, ibutang sa unang tulo ka andana ang outpatient department, emergency department, radiology department ug X-ray department. Ang unang tulo ka andana adunay capacity alang sa 150 ka mga pasyente.
Ang siyudad nigahin og P567 milyones alang sa first phase sa pagtukod sa CCMC ug laing P283 milyones sa second phase nga maglakip sa pag-instalar sa linya sa tubig ug kuryente, fire protection, mechanical, communication ug structural finishes.
* * *
Apan si Cebu City Administrator Floro Casas Jr. miingon nga mahimong ablihan ang unang tulo ka andana, apan matod niya, “the operation is another story.” Lain na sab na nga estorya kay duna pay 200 ka construction workers nga nagtrabaho niini.
Matod ni Casas, kinahanglan pang ma-instalar ang hospital equipments. Si CCMC Administrator Yvonne Feliciano niingon nga naglakip kini sa computerized tomography (CT) scan, magnetic resonance imaging (MRI) ug advanced room equipment.
Nahagit kaha si Labella human na-viral sa social media ang mga hulagway sa wa pa mahumanga CCMC building?