DILI na gyud kapugngan, buwan na sa Pasko, ugma, Martes, Disyembre 1. Ang tradisyonal nga kalihokan sa mga Pinoy mosikad na sa bisan asang aspeto sa palibot, gikan sa pamatigayon, tunghaan, buhatan ngadto sa pamilya.
Subo nga pamalandungon nga ang tradisyon sa Pasko ning tuiga dunay dakong kausaban mugna sa pandemiya sa coronavirus disease 2019 (Covid-19). Ang kagamhanan mipatuman sa higpit nga health protocol sa panglawas.
Apektado ang tanan. Ang panagtapok gilimitahan ug hugot nga gipatuman ang social distancing uban sa kanunay nga pagsul-ob og face mask ug face shield sa publikong dapit. Unsay dagway sa Pasko sa ingon ini nga sitwasyon? Way kasadya ning taknaa.
Apan ang pamilya maoy labing apektado sa tanan human daghang magkalagyo panahon sa Pasko kon magpadayon subra kahigpit nga polisiya. Pipila ka local government units (LGU) sa ubang bahin sa Kaysa-an ug Mindanao nga nangayo og daghang rekisitos lakip sa swab test sa Covid-19.
Kon molukat og ticket sa barko gikan sa Sugbo, ang swab test ang kinahanglan. Ang swab test mahal (dunay libre apan limitado) ug dugang pa nga ipaubos gihapon sa mandatory 14-day quarantine bisan negatibo sa Covid-19. Dili ba anti-poor ug anti-family?
Makaluluoy ang gikan sa dakbayan sa Sugbo human gikahadlokan nga magdala og virus tungod sa pagkabaniog niadto nga nga kanhi epicenter sa Covid-19 sa nasod. Apan wa kaha sila masayod nga karon, mikunhod na pag-ayo ang kaso tungod sa maayong pagdumala sa mga awtoridad.
Nakasabot kita sa paghigpit sa protocol sa maong mga LGU sa pagsanta sa virus. Apan kon subra ra, abuso na. O, dili kaha dunay nagpaluyong korapsyon pinaagi sa paggamit sa Covid-19 sa pagpagwas og pundo? Hinaut nga dili unta.
Mas maayong magkahiusa ang pamilya sa Pasko, dili magkalagyo, ubos sa bag-ong normal nga kinabuhi.