Human sa gipahigayon nga Suroy-Suroy Sugbo SMB (Sta. Fe, Madridejos, Bantayan) Escapade niadtong Nobiyembre 27-29, 2020, nanghinaot karon ang mga namaligya og buwad sa Lungsod sa Bantayan nga makabangon human naapektohan sa pandemiya.
Usa ang magtiayon nga sila Ramon ug Nancy Boytrago sa mga malaumon nga makabangon og balik ang industriya sa pagpamuwad sa Bantayan.
Naundang sa pagpamaligya ang magtiayon dihang gipatuman ang community quarantine sa mga nagkalainlaing lugar nunot sa hulga sa coronavirus disease 2019 (Covid-19).
“Pagsugod sa pandemiya kanang nakaurong gayud mi sir og duha ka bulan kay wala may mamalit,” asoy ni Ramon.
Nisuway sila og pagpamaligya balik sa ilang puwesto sa merkado sa lungsod niadtong Mayo apan hinay ang halin tungod kay gamay ra ang mamalit.
Tungod usab sa community quarantine nalimitahan ang lihok sa publiko hilabi na ang pagpanawat og mga turista nga maoy usa sa gisaligan sa ekonomiya sa isla.
“Karon nibalik mi adtong Mayo naay tagsa mamalit pero hinay gayud,” asoy ni Ramon.
Ikalipay nila Ramon ug Nancy ang pagpahigayon og Suroy-Suroy Sugbo sa Bantayan tungod kay alang kanila usa kini ka higayon aron mahalinan.
“Lahi na karon nga may Suroy-Suroy Sugbo, pag may mga beach, may mga bisita, maka-income na kami karon,” asoy ni Ramon.
Niadtong Nobiyembre 27, upat ka mga chartered flights gikan sa Mactan-Cebu International Airport ang nitugpa sa gipanindot nga Bantayan Island Airport.
Sakay niini ang mga partisipante sa Suroy-Suroy Sugbo SMB Escapade nga nibisita sa tulo ka mga lungsod sa isla.
Gawas sa buwad ug poultry farm sa Bantayan, gipasigarbo sa Sta. Fe ang mga nindot nga beach sa dapit, samtang ang Madridejos nipakita sa ilang industriya sa crab meat ug scallops.
Gihangop ni Gobernador Gwendolyn Garcia ang pagpasundayag sa tugpahanan ug ang pagbukas balik sa turismo sa isla.
“This is truly a historic moment. When something is meant to be, the right people are put together at the right time for the right reason. This effort that will serve the people of Santa Fe, Madridejos, and Bantayan as well as so many other tourists that wish to come is the right reason and that is why we have come together in order to achieve that dream,” asoy ni Garcia atol sa welcome ceremony nga gipahigayon sa tugpahanan.
Naghinaot karon ang mga residente nga mabalik ang kusog sa ilang panginabuhian karon nga abli na og balik ang turismo sa Isla sa Bantayan, labina sa buwad nga nag-unang produkto sa isla.