PERSONAL nga kaaway o bahin sa negosyo mao ang posibleng motibo sa pagbanhig-patay sa usa ka negosyanteng babaye duol na sa grahian sa iyang sakyanan sa Gabutan compound sa Barangay Guadalupe, siyudad sa Sugbo niadtong Sabado sa gabii, Nobiyembre 28.
Ang biktima mao si Grace Gabutan, 34, molupyo sa naasoy nga dapit ug giingong buwag sa bana ug annulled na ang ilang kasal.
Si Police Captain Janelito Marquez, hepe sa Guadalupe Police Station, nagkanayon nga ang biktima sakay sa iyang awto nga nag-inusara ug padulong na mogarahe sa iyang sakyanan dihang kalit nga niabot ang duha ka mga lalake sakay sa motorsiklo ug gipaulanan og mga bala ang biktima.
Human sa pagpamanhig, dali nisibat ang duha ka mga mamumuno.
Ang mga operatiba sa Scene of the Crime Operation (Soco) dunay narekober nga tulo ka mga kabhang sa bala sa .45 sa nahitaboan.
Dugang ni Marquez nga nakaangkon si Gabutan og daghang samad sa iyang lawas nga hinungdan sa iyang kamatayon.
Samtang, una nga gitutokan karon sa kapulisan sa Guadalupe nga anggulo sa krimen mao ang personal grudge ug negosyo niini.
“Wala pa mi nakabalo kon unsay negosyo sa biktima kay amo usab gisabot ang pamilya nga anaa pa sila sa pagbangutan. Tungod siguro nakalitan sa panghitabo,” matod ni Marquez dihang gikahinabi sa Superbalita Cebu kagahapon, Nobiyembre 29.
Dugang ni Marquez, kabahin sa anggulo sa love triangle, wala silay nakita nga posibleng hinungdan human giingong wala kini karelasyon sa pagkakaron.
“Mura wala man daw siya uyab, pero ingon iyang igsuon na-anulled na sila sa iyang bana sa una. Pero tanang anggulo among tan-awon usab kon duna bay posible nga atong makuha nga makatabang sa kaso,” dason ni Marquez.
Gibutyag ni Marquez nga naa unta silay nakuha nga footage sa CCTV camera duol sa panimalay sa biktima apan walay pulos human hanap ang kuha niini, di maklaro ang mga mamumuno.
“Hanap kaayo ang pagka kuha..” dugang niya.
Ang mga mamumuno pulos naka-bonnet nga nagsakay og motorsiklo.