Gipusil patay sa Lunes sa udto, Nobiyembre 30, 2020 sa wa pa mailhing nag-inusarang mamumuno ang usa ka barangay konsehal sa sityo Adelfa, Barangay Pardo, Dakbayan sa Sugbo.
Si Police Corporal Jeymus Tordios sa Pardo Police Station niila sa biktima nga si Kinasang-an barangay councilor Ponciano Villamil, 63, taga Sityo Suran.
Matod ni Tordios nga sa ilang inisyal nga imbestigasyon, si Villamil paingon unta sa iyang pag duty sa barangay apan wala na kalahos dihang gisugat sa gunman samtang naglakaw pagawas sa eskenita sa sityo Adelfa.
Matod ni Tordios, si Villamil naigo sa likod sa lawas ug namatay. Ang gunman nakuhaan og CCTV footage, nagsul-ob og puwa nga sapot, nagkawo ug nagtaptap.
Nakakuha ang mga taga Scene of the Crime Operation (Soco) og duha ka kabhang sa bala sa kalibre .45 nga pistola.
Samtang si Kinasang-an Barangay Kapitan Susan Enriquez sa interbyu sa Superbalita Cebu, niingon nga sumala sa iyang nahibaw-an gikan sa mga sakop sa Lupon Tagapamayapa sa iyang barangay, dunay mga reklamo batok kang Villamel kalabot sa yuta. Apan wa siya masayod sa kinatibuk-ang estorya.
“Matod pa sa mga complainant nga fully-paid na sila pero sa pagtan-aw nila sa lugar wala pa gyud ma-develop,” nagkanayon si Enriquez.
Nianang buntag dunay usa ka tawo nga nagmotorsiklo nga nangita kang Villamil. (BBT)