ANG boxing promoter ug kanhi superstar nga si Oscar de la Hoya naghinaot nga isangka ang iyang batos nga si Vergil Ortiz Jr. ngadto kang Terrence Crawford.
Si de la Hoya, ang tag-iya sa Golden Boy Promotions, nibutyag nga andam si Ortiz kang World Boxing Organization (WBO) welterweight champion nga si Crawford.
Ang 22-anyos nga si Ortiz (16-0, 16 KOs) gidumala sa Golden Boy Promotions samtang ang 33-anyos nga si Crawford (37-0, 28 KOs) ubos sa Top Rank Promotions ni Bob Arum.
Apan matod ni de la Hoya nga walay issue sa duha ka rival promotions kon mahitabo man ang maong away.
“I think working with (Top Rank chairman) Bob (Arum) has always been a pleasure so I am sure it would be no problem,” matod ni de la Hoya sa report sa boxingscene.com.
Mismo si de la Hoya niagi pud sa promotion ni Arum sa aktibo pa kini sa boksing.
Batbat ni de la Hoya nga si Ortiz mipakita og dako nga potensiyal. Sa iyang talento kaya niini lupigon ang bisag kinsa sa welterweight division. (RSC)