TNT nahutda’g signal

NIKALIT og kapawong ang kusog sa TNT Tropang Giga sa overtime period nga maoy nakapilde kanila batok Barangay Ginebra Gin Kings sa Game 1, 100-94, sa PBA Philippine Cup Finals niadtong Dominggo sa gabii, Nobiyembre 29, 2020 didto sa sa Angeles University Foundation (AUF) Sports and Cultural Center sa Angeles, Pampanga.

Ang Tropang Giga mi-iskor lang og dos puntos sulod sa lima ka minutos sa overtime. Ang Sugbuanong si Roger Pogoy maoy mipasulod sa nag-inusarang field goal sa TNT sa nahabiling 1:20 sa duwa.

Samtang galisod ang TNT sa pag-iskor, ang Ginebra yanong nipupo og puntos tungod sa mga nindot nga mga pasa sa beteranong point guard nga si LA Tenorio.

Si Tenorio nipakita sa iyang playmaking ability sa hinapos nga bahin sa Game 1, diin nihimo siya’g outlet pass kang Aljon Mariano nga nitapos sa play pinaagi sa layup.

Gisundan kini og drop pass ngadto kang Japeth Aguilar nga niresulta sa two-handed nga hansak nga maoy nakalansang sa duwa sa iskor nga 100-94.

Si Tenorio pud ang nihimo og play sa hinapos nga bahin sa fourth quarter aron madala ang duwa ngadto sa overtime. Nipasulod og layup si Arvin Tolentino gikan sa pasa ni Tenorio aron tablahon ang duwa , 92-92, sa nahibiling 5.0 segundos sa fourth quarter.

Aduna pa untay tsansa ang TNT nga tapuson ang duwa sa regulation apan nasipyat si Jayson Castro sa iyang floating shot.

Gikontrolar na dayon sa Ginebra ang duwa sa overtime.

“In LA we trust. He has been with us for so long and he’s used to this kind of situation,” saysay ni Ginebra coach Tim Cone sa post-game press conference.

Si Tenorio nitapos sa Game 1 nga adunay 12 puntos, 10 ka assists ug lima ka rebounds.

“That’s was an incredible back-and-forth action. They (Tropang Giga) were doing a good job on Stanley (Pringle), switching and doubling him. We start to put the ball on LA’s (Tenorio) hand and let him make the decision,” matod ni Cone.

Si Japeth Aguilar nitali og 25 puntos, 16 ka rebounds, samtang si Stanley Pringle nipupo og 24 puntos, pito ka rebounds ug pito pud ka assists aron aswaton ang Ginebra sa 1-0 nga labaw.

Ang rookie nga si Tolentino nidugang pud og 14 puntos, ug si Scottie Thompson niamot og 15 puntos, siyam ka rebounds ug lima ka pasa.

Si Parks maoy nangulo sa pildero nga TNT pinaagi sa iyang 20 points, nidugang og 19 puntos si Pogoy, 14 puntos kang Jay Washington ug 12 puntos gikan kang Castro.

Ang Game 2 ipahigayon karong Miyerkules, Disyembre 2. (RSC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph