Nagpadayong galayog ang karera sa Sugbuanong karateka nga si James delos Santos sa iyang pagbulsa ika-24 niyang bulawang medalya sa online competition nga SportData eTournament World Series.

Mao pud kini ang ikaduhang higayon nga nidaog si delos Santos sa SportsData ETournament World Series nga mao ang pinaka-prestihiyoso nga virtual kata tournament tungod sa kadako nga ranking points nga ihatag niini.

Gilupig ni de los Santos ang pambato sa Switzerland nga si Matias Moreno, 24.9-23.7, aron ibulsa ang iyang ika-24 nga gold medal sukad siya niapil og online tournament niadtong Marso.

“This is the most prestigious virtual kata tournament because the amount of ranking points awarded is nearly x4 to that of a regular virtual tournament. I’ve widened the gap even more in the eKata world rankings,” matod ni de los Santos sa interbiyu sa Superbalita Cebu.

Matod niya, daghan pa siya og virtual tournament nga apilan aron patas-an pa iyang labaw sa World No. 1 ranking.

Si delos Santos karon ang gahupot sa No. 1 ranking sa online tournament human niya naapsan ang iyang rival nga si Eduardo Garcia sa Portugal niadtong Oktubre 15.

Tungod sa maong kalampusan sa SportsData eTournament World Series mas modako pa ang labaw ni de los Santos kang Garcia.

Sa wala pa ang torneyo, nilabaw si delos Santos nga adunay 11,920 puntos samtang si Garcia anaa sa layo nga ikaduhang pwesto nga dunay 8,740 puntos.

Tungod sa hulga sa Covid-19, ang kata tournament gipahigayon na karon pinaagi sa online. Ang mga karateka mopadala sa ilang perfomrance pinaagi ug iskoran kini sa mga judges.