Boluntaryo nga pagdonar og dugo gipalambo sa 4Ps

ANG kalibotan nag-atubang karon og health crisis tungod sa Covid-19, busa ang donasyon nga dugo gikinahanglan kaayo sa pagsalbar sa kinabuhi sa tawo.

Ang Department of Social Welfare and Development (DSWD) 7 nipalapad sa ilang kaakohan sa pagsuporta sa mga serbisyo sa National Voluntary Blood Services Program pinaagi sa pagpalambo niini sa Pantawid Pamilyang Pilipino Program (4Ps) beneficiaries alang sa boluntaryo nga pagdonar sa ilang dugo.

Kabahin kini sa National Blood Services Act of 1994 o Republic Act 7719, nga nagpalambo ug nagdasig sa bluntaryong pagdonar og dugo sa katawhan, pagsilsil sa kahibalo sa publiko sa mga prinsipyo bahan sa paghatag og dugo.

Uban sa dul-an sa 280,000 Pantawid Pamilya partner-beneficiaries sa Central Visayas, sila dakng potensiyal nga tinubdan sa dugo sa Department of Health (DOH).

Ang Sub-National Blood Center for the Visayas sa Department of Health - Central Visayas Center for Health Development nagsugod na sa ilang Blood Donor Recruitment Orientation sa barangay health center ngadto sa mga benepisaryo uban sa City/ Municipal Links sa matag local government units (LGUs), usa ka buwan sa dili pa ang schedule sa mobile blood donation activity.

Ang Links mohatag og listahan sa Pantawid beneficiaries kinsa boluntaro nga mohatag sa ilang dugo. Moayuda usab atol sa pagkuha og dugo sa mga benepisaryo.

Ang bloodletting activities gihimo sa Rural Health Units sa matag LGUs, samtang gma dagkong dakbayan sa Sugbo, Lapulapu City, ug Mandaue City, kini gihimo sa barangay health stations duol sa gyms o covered courts aron dili maghuot ug moobserbar sa health protocol, labina sa social distancing.

Aron makadonar og dugo, ang mga boluntaryo dunay timbang nga dili mominos 50 kilograms, average pulse rate of 60-100, blood pressure limit dili moubos sa 90 over 60 ug dili molabaw sa 160 over 100, nakatulog og 6 ka oras sa wa pa kuhai og dugo, wala manigarilyo sulod sa 3-4 ka oras sa di pa kuhana og dugo ug wala makainom og bino sulod sa dili mominos 3-4 oras.

Niadtong Nobiyembre 9, si DSWD 7 Regional Director Rebecca P. Geamala ug Assistant Regional Director for Operations (ARDO) Shalaine Marie S. Lucero uban sa DOH CVCHD Regional Director Dr. Jaime Bernadas ug Subnational Blood Center for Visayas Head of Laboratory Dr. Sophia Mancao ninglagda og kasabotan o memorandum of agreement bahin sa maong katuyoan.

Ang naasoy nga kalihokan gisaksihan sa mga opisyal sa Department of the Interior and Local Government, Office of the Presidential Assistant for the Visayas, ug ubang ahensiya sa kagamhanan, kinsa nanaad sa ilang pagka komitadao sa bloodletting campaign. (PR)