LABING moderno nga building sa lungsod sa Tuburan ang among gibisita kagahapon. Nag-soft opening ang Tuburan Café. Mao kini ang coffee shop nga naggamit ug nagduso sa kape nga gitanom diha mismo sa lungsod sa Tuburan.
Mao kiniy coffee shop nga makaingon ko, naka-set og standard karon sa Pilipinas. Tungod kini sa coffee maker nga labing modern sab. First kuno sa tibuok Pilipinas. Didto man si Board Member Glenn Soco nga maoy tag-iya sa Coffee Dream. Iyang gihulagway ang coffee machine sa Tuburan Café nga “Ferrari” sa mga coffee machine.
“Unya na ta mag-grand opening inig human sa Covid-19,” matod pa ni Bise Mayor Aljun Diamante aron dunay kahigayonan nga daghan ang makatambong. Kagahapon, tayming nga iyahang birthday.
Tayming sab nga usa kini ka highlight sa proyekto nga nasugdan sa pagpananom og kape diha sa kabukiran sa lungsod mga walo na ka tuig nga miagi. Proyekto kini nga gisugdan ni Diamante isip tipik sa iyang mga programa sa pagpalambo sa lungsod.
Aron dunay outlet sa kape nga produkto sa mga katawhan, gitukod ni Bise Mayor Diamante kining coffee shop. Mas dunay oras karon si Aljun kabahin sa iyang mga mga adbokasiya ug usa niini mao kining coffee shop.
Si bise mayor baya mao baya say nasudnong lider sa Political Officers League of the Philippines (POLPhil) nga nag-national assembly karong bag-o.
Karon, gawas nga gipadayon ang iyang mga programa, nagkanayon ang iyang igsuon nga si Mayor Danny Diamante nga gawas nga ipadayon ang mga nasugdang programa, gilantaw nila karon ang Tuburan mga 30 ka tuig gikan karon.