SUGOD karon, 25 na lang ka adlaw Pasko na. Bisan pa sa pandemya sa Covid-19 nga atong giatubang, ang pagsaulog sa pagkatawo ni Hesukristo, atong Manunubos, di kalikayan. Bisan pa sa kwarentinas nga gipatuman sa kagamhanan, ang mga tawo mogawas gyud labina kay ang mga mall nagpasiugda og Christmas sale.
Tungod ning kasaulogan sa Pasko, ang atong lokal nga mga opisyal nakuyawan nga basin og mosaka og balik ang kaso sa inpeksyon sa Covid-19 tungod kay manggawas ug magtapok man ang mga tawo ning panahon sa Pasko, labina og dunay sale ang mga mall.
Hinuon, di sama sa Amerika, mituman ta sa mando sa pagsul-ob og mask ug face shield. Ang nakaapan lang kay dunay uban nga ang face shield naa sa ulo gitungtong bisan pa sa pahimangno sa nagdumala sa mga mall. Tungod sa kadaghan sa tawo, di na matuman ang social distancing sama sa nahitabo didto sa Kota Park, Madridejos, Bantayan Island sa pag-abli og balik sa turismo, nga gipasiugdahan sa Kapitolyo nga karon imbestigahon sa Department of Interior and Local Government (DILG) sa maong kalapasan.
Si Madridejos Mayor Salvador dela Fuente andam moatubang sa imbestigasyon nga pagahimuon sa DILG. Si Secretary Harry Roque, ang tigpamaba sa Malakanyang, igo lang miingon nga imbitado ra siya apan andam usab siya nga moatubang sa imbestigasyon. Ang Suroy-Suroy sa Sugbo programa sa Kapitolyo ubos sa panggamhanan ni Gob.
Gwen Garcia. Gani, nakita sa hulagway nga si Gobernador Gwen misayaw uban sa mga bata.
Si Dela Fuente mipahimangno sa iyang katawhan nga magbantay sa ilang panglawas kay basin og dunay asymptomatic nga nagsuroy-suroy nga posible nga nakatakod kanila. Manghinaut na lang ta nga walay nagdala og virus niadtong Biyernes sa maong kalihokan. Merry Christmas sa tanan!
* * *
PEACE na? Sa unang higayon, gidkelarar sa Malakanyang nga “special non-working day” ang Dec. 4, ang adlaw nga natawhan ni kanhi senador Serging Osmena, Jr., ang anak ni kanhi Presidente Serging Sr. ug amahan nila ni kanhi Cebu city mayor Tomas ug kanhi senador Serge. Si Serging Jr. kanhi gobernador sa Sugbo sa tuig 1951-1959, mayor sa dakbayan sa Sugbo 1959-1963 ug senador 1965-1971. Nalakip si Serging sa Miranda Plaza bombing apan naluwas siya unya pagka Sept. 21, 1972 gideklarar ang martial law.
Ang Proclamation No. 1053, pinirmahan ni Executive Secretary Salvador Medialdea, nagdeklarar nga holiday sa Biyernes agi og pasidungog sa ika 104 nga anibersaryo sa pagkatawo ni Serging Jr. Nagpasabot ba ni nga peace na sila ni Presidente Digong ug Tomas Osmena? Kon makahinumdum ka, nasuko si Presidente Digong sa pagpagawas ni Tomas sa mayor pa siya sa duha ka tawo nga nadakpan nga namaligya og refilled LPG, nga ang Cebu City Police Chief mao si Col. Royina Garma.
Apan sa wa pa ang maong kaso, atubangan sa pundok sa mga mayor, nagpasalamat si Presidente Duterte ni Tomas sa iyang pagdaug dinhi sa dakbayan niadtong piliay sa 2016 diin si Tomas midaug usab batok ni kanhi Mayor Mike Rama. Makaalsa sa kilay, di ba?