MGA duha ka semana na lang, ipahigayon na usab ang tinuig nga kalihukan sa Misa De Gallo. Ang Misa De Gallo usa ka rehilyusong kalihukan sa mga Romano Katoliko sa tibuok kalibutan. Sugdan kini sa Disyembre 16 sa kaadlawon ug tapuson sa gabii sa Disyembre 24, pinaagi sa Misa De Aguinaldo.
Ug tungod sa pandemya nga mugna sa coronavirus disease (Covid-19), adunay debate karon kon angay ba kining ipadayon sama sa naandan o kanselahon na lang gyud? Kon ipahigayon kini, ma-obserbar ba ang social distancing? Makaya ba sa taga simbahan ug sa atong kapulisan ang pagkontrolar sa katawhan nga motambong sa mga misa sa matag parokya?
Nganong mosugal man kita? Kon nahimo man nato nga walay misa niadtong panahon sa lockdown, nganong dili man karon nga siyam ra man na ka adlaw? Ang Inter-agency Task Force for the Management of Emerging Infectious Diseases (IATF) mihatag sa katungod sa mga local government units (LGUs) sa pagdesider kon ila bang tugutan o kanselahon ang Misa de Gallo.
Dunay pagtuon nga gihimo ang mga behavioral scientists niadtong 2016 sa wala pa ang Covid-19 pandemic nga nakapamatuod nga ang stress mabatyagan sa tawo sa walay kasiguruan o uncertain things. Mas dako pa kay sa stress nga mabatyagan sa mas siguro nga butang.
Sama sa pagka-stressed nato sa ka walay kasiguruan kon unsay mahitabo sa kalibutan ning panahon sa Covid-19 o sa atong panglawas kon makig-uban kita sa katawhan? O unsay mahitabo sa atong mga trabaho o sa atong mga anak o sa atong mga negosyo? Ug mao nga dili ikahibulong nga sa usa ka bag-ong survey napamatud-an nga miambak og tulo ka pilo ang gibating stress ug anxiety sa katawhan karong panahona gumikan sa Covid-19.
Natandog ang tanang mga kalihukan sa gobiyerno, eskuwelahan, trabaho, simbahan ug negosyo. Halos tanan naligsan ug nausab ang dagan sa kinabuhi sa halos tanan kanato gumikan sa pandemya. Karon magtimbang-timbang na usab kita kon angay bang tugtan ba ang pagpahigayon sa tinuig nga pagsaulog sa Misa De Gallo. (bobbygnalzaro@gmail.com)