Editoryal: Sulbara ang mga krimen

Editorial Cartoon by Ariel Itumay
Editorial Cartoon by Ariel Itumay

SUNODSUNOD na ang pagpusil patay nga mga kaso sa Dakbayan sa Sugbo. Niadtong Sabado sa gabii, Nobiyembre 28, 2020, usa ka batan-ong negusyanteng babaye gipusil patay sa riding in tandem.

Niadtong Nobiyembre 24, usa ka abogado ang gipusil sa riding in tandem gihapon. Pipila ka mga oras, namatay ang abogado sulod sa usa ka tambalanan.

Buntag sa Nobiyembre 30, barangay konsehal sa Kinasang-an gipatay usab sa bugtong mamumuno nga naglakaw lang sa dan human gipusil ang opisyal.

Kining mao nga mga krimen nahitabo taliwa sa paglugak sa quarantine control samtang nagpadayon na paglihok ang katawhan ubos sa modified general community quarantine. Niadtong hugot pa ang quarantine, pwerteng tibugsok sa gidaghanon sa mga krimen. Illegal drugs ray wala.

Klaro nga di related o way kalambigitan ang mga patay, apan klaro nga namalik na paglihok ang mga gun-for-hire. Ang nakapait pa, kay naandan og mga anggulo ang kapulisan, personal grudge, love triangle o kon nalambigit sa drugs, onsehan dayon ang ipalutaw.

Nasayod na man ang katawhan niining mao nga mga anggulo. Apan wa sila masayod unsay detalye ug kalambuan sa mga imbestigasyon. Mao ni ang rason kon nganong maglisod ang kapulisan sa pagpabalik sa pagsalig sa publiko kanila.

Malipay tuod ang katawhan nga sila nanabang sa yano nga mga lungsoranon. Kana public relations alang sa pogi points. Apan kon kining pogi points matabunan sa di maayong imbestigasyon sa mga krimen, di kini makahingpit sa pagpabalik sa pagsalig sa katawhan kanila.

Kon ang mga checkpoint ug anti criminal nga mga kalihukan makapaislag sa mga kriminal, ang maayong imbestigasyon aron pagsulbad sa krimen maoy laing suwab sa pagpabalik sa hingpit sa pagsalig sa katawhan sa kapulisan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph