Nakadakop og kapin sa 70 ka mga motorsiklo ug four-wheeled nga mga sakyanan ang Land Transportation Office (LTO) 7 ug Regional Highway Patrol Unit (RHPU) 7 sa ilang hiniusang operasyon niadtong Dominggo, Nobiyembre 29, 2020.
Kini ang gipahibawo ni LTO 7 Regional Director Victor Caindec human sa ilang operation sa Transcentral Highway sa Barangay Malubog, dakbayan sa Sugbo.
Gitug-an ni Caindec nga naka-isyu sila og 74 ka temporary operator’s permit (TOP) sa mga driver kansang sakyanan adunay mga kalapasan sa lagda sa trapiko.
Ang grupo nilang Rafael Dominico Cortes sa LTO 7 ug Police Captain Silvestre Cenia Jr., nakapara usab og 80 ka sakyanan ug 60 ka motorsiklo nga kumpleto sa mga dokumento sama sa official receipt (OR) certificate of registration (OR) ug driver’s license.
Labing daghan nga violations mao ang pagtaod og suga (accessories) sa ilang mga motorsiklo diin 23 ang nadakpan; wala magtaod og seat belt (10); wala makadala sa OR ug CR (16); walay helmet (5); way plaka nga gitaod (2); way lisensya (2); giusab ang tambutso (5); guba ang brake light (5) ;ug daghan pang uban.
Gikuha ang ilang mga lisensiya.
Si Caindec niawhag sa mga nadakpan sa pagprotesta sa apprehension sa LTO 7 ug di dayon mo-post sa social media ug pasanginlan nga nangurakot ang law enforcers.
“Sa mga nadakpan nya post dayon sa ilang yawyaw, may I remind you kung naa kay reklamo you have the right to protest. Pero kana mo post sa social media kay mura gusto nimu ipagawas nga sakto gyud ka pero sayop diay, siguroha nga di na ka madakpan balik,” matod ni Caindec.
Ang pagpahigayon sa joint operation pinasikad sa Republic Act 4136 ug RA 10883, Anti Overloading, Speeding, Presidential Decree 96 nga nagdili sa pagtaud og accessories sa sakyanan nga sobra ra ka langas ug ka hayag.
Kabahin sab kini sa PUV Covid safety compliance marshaling ug police visibility sa modified general community quarantine.