IPATAWAG ni Mayor Edgardo Labella sa Martes, Disyembre 1, ang kadagkuan sa Simbahang Katoliko aron hisgotan ang mga lakang nga mapugngan ang pagkatap sa Covid-19 atol sa pagahimuon nga mga Misa de Gallo nga magsugod sa Disyembre 16, 2020.
Ang mayor nibutyag nga lakip sa ilang hisgotan mao ang pagpatuman sa minimum health protocol ug istrikto nga 50 percent capacity sa mga simbahan alang sa social distancing.
Ila usab nga plantsahon ang curfew ordinance sa dakbayan takdo sa misa sanglit maigo niini ang oras sa pagsimba ug daghan pa.
Lakip sa ipatawag ni Labella mao ang Cebu City Police Office (CCPO) pinangulohan ni Police Colonel Josefino Ligan; Emergency Operations Center nga gi-representahan ni Konsehal Joel Garganera; Cebu City Transportation Office ni Alma Casimero, Parish Pastoral Council ug Konsehal Phillip Zafra, chairman sa Committee on Public Order and Safety.
Ang tigom sugdan sa ala 1 sa hapon sa conference room sa Office of the Mayor sa Cebu City Hall.
Ang mayor nipadayag nga dili na dako og adjustment sa misa sanglit ang Catholic Church nipahigayon na og misa sa ilang mga simbahan ug sundon gihapon ang 50% nga capacity.
Way mga Misa de Gallo sa mga kapilya.
NANGANDAM
Ang CCPO nangandam na usab niini.
Matod ni Police Lieutenant Colonel Clark Arriola, information officer sa CCPO, nga aduna na silay giila nga 35 ka mga dagkong simbahan sa siyudad sa Sugbo.
Giandam nang daan sa CCPO ang kapin sa 100 ka mga pulis aron ipakatap sa matag simbahan.
Usa sa ilang gipangandaman mao ang pagdagsa sa mga manimbahay. Iyang giangkon nga kon sila lang, di maato sa kapulisan ang pagbantay hinungdan nga nagkinahanglan sila sa abag sa mga parish security. (PAC, AYB)