NAGKANAAS nga nanagan ang mga sabungero sa pagronda sa mga awtoridad alas 2 sa hapon, Dominggo, Nobyembre 29 sa probinsya sa Cotabato.
Matud ni Cotabato Police Provincial Director Colonel Henry Villar nga nakadawat og impormasyon ang Magpet Municipal Police Station sa mga nagsabog-sabong sa Barangay Bantac Magpet.
Gironda dayon sa mga pulis ang mga nagsabong apan nakabantay ang mga sabungero nga abtik na nanagan ug misum-ok sa kalibunan.
Narekober sa mga awtoridad ang pito ka sudlanan sa manok, mga tsinelas, pisi ug kuwarta nga pusta sa sabong.
Suwerte sa mga nagsabong gumikan sila nakaikyas sa mga pulis apan dimalas sab gumikan nahibilin ang notebook nga listahan sa mga nagtari-tari apil ang ilang pusta.
Kahinumdoman nga hugot nga gidili sa Inter-Agency Task Force ang sabong-sabong sa posibleng pagkuyanap sa sakit nga coronavirus disease.
Sa kasamtangan, giandam na sa Magpet police ang tukmang kaso sa mga nagtari-tari sa Barangay Bantac og dunay mga opisyal sa barangay ang nalambigit. (Edgar Fuerzas)