NABUGTONGAN sa kinabuhi ang usa ka negusyante ug usa ang naangol sa pagpamusil alas 9:50 sa buntag Dominggo, Nobiyembre 29, 2020, sa probinsya sa Cotabato.
Giila ang napatay nga mao si Esmail Raja Alam Asnor, 23, minyo, buy and sell trader ug nagpuyo sa Kidapawan City.
Samdan sab si Nasrudin Usman Guiamadin, 27, minyo, mag-uuma ug taga Barangay Bualan, Pikit North, Cotabato.
Gibutyag ni Pikit Chief of Police Captain Mautin Pangandigan nga samtang namalit og sapot pang-ilawom (underwear) si Guiamadin uban ang iyang asawa sa public market sa Pikit, Cotabato, kalit lang mibutho ang usa ka wala mailhing tawo ug gipusil kini gamit ang kalibre .45 nga pistola.
Abtik sab nga miikyas ang suspetsado nga misakay og motorsiklo sa naghulat niya nga kauban gawas sa palengke.
Nakaangkon og upat ka samad pinusilan si Guiamadin nga maoy target sa pagpamusil ug naigo si Asnor sa dughan sa saag nga bala nga naglingod atbang sa tindahan.
Ang mga biktima pulos gipangdala sa Cruzado Medical Hospital apan nakabsan sa kinabuhi si Asnor samtang kritikal ang kondisyon ni Guiamadin.
Sa kasamtangan, ang kapulisan sa Pikit Cotabato padayon nga nag-imbestiga kalabutan sa maong hitabo. (Edgar Fuerzas)