SUPERBALITA CEBU

Misis nakit-an kay kisame sa motel nalusno

HUGNO: Gitudlo sa mga pulis ang lungag sa kisame sa kwarto sa motel diin ang asawa miagi sa pagtago. (Gikan sa video ni Edward Ligas)

ARON di masakpan sa bana, nitago ang asawa sa kisame human maabtan nga nagkuyog sa giingong kabit nga seaman sulod sa usa ka motel sa North Reclamation Area sa Barangay Subangdaku, Dakbayan sa Mandaue, alas 9:30 sa buntag sa Lunes, Nobiyembre 30, 2020.

Apan nabuslot ang kisame, natagak iyang duha ka mga sandal ug niguho ang duha ka mga tiil hinungdan nga nasakpan sa bana ug kapulisan.

Mga ngan sa magtiayon ug giingong kabit gipugngan ning mantalaan.

Sa pakighinabi sa Superbalita Cebu kang Police Sergeant Ernesto Rivera, desk officer sa Subangdaku Police Station, siya niingon nga gisundan sa bana ang iyang asawa gikan sa ilang balay sa Siyudad sa Talisay.

Ang bana nga seaman dugay nang nagduda sa iyang asawa kay wa na kini gana sa pakig-sex kaniya ug magsige na lang og pangaway.

Ang asawa nga nagsakay og taksi kay giingong padung siya motrabaho wa kabantay nga nisakay og laing taksi ang iyang bana.

Iyang nakit-an ang iyang asawa nga nipaingon sa pier area sa Dakbayan sa Sugbo ug gihunongan niini ang giingong kabit. Ang duha iyang nasundan sa usa ka motel hinungdan nga nanawag ang bana og usa ka higala nga mao say ni-contact sa kapulisan sa Dakbayan sa Mandaue.

Atol sa pag-adto sa iyang bana ug kapulisan sa motel, daling nikatkat ug mitago ang asawa sa kisame samtang ang lalake nigawas sa kwarto nga nag-inusara.

Ilang gituohan nga dunay nakapahibawo sa duha sa pagpangabot sa bana ug pulis. Gipabalik nila ang lalake sa sulod samtang nangita sila sa asawa.

Wa magdugay, dunay nilagubo sa kisame nga nalusno, nangatagak ang duha ka sandals ug ningguho ang duha ka mga tiil sa asawa. Gipangsikop ang duha ug gidala sa Subangdaku Police Station.

Matod ni Rivera nga kay holiday, nagpabilin ang duha sa police station kay di nila ma-process kay ang bana desidido nang mokiha sa iyang asawa ug giingong kabit.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!