Police Brigadier General Ronnie Montejo pormal nang nilingkod isip bag-ong hepe sa Police Regional Office-Central Visayas (PRO 7) hulip kang Police Brigadier General Albert Ignatius Ferro.
Si Ferro mao na ang mangulo sa Directorate for Information and Communication Technology Management (DICTM) sa Camp Crame.
Si Ferro natudlo nga PRO 7 director niadtong Pebrero 6, 2020. Sulod lang sa siyam ka buwan ug 25 ka adlaw ang iyang pagdumala diin naatol usab nga miigo ang coronavirus (Covid).
Dako og natampo si Ferro sa pagpugong sa coronavirus disease sa Central Visayas pinaagi sa pagpatuman sa minimum health standard, labina sa Dakbayan sa Sugbo, human misulbong ang mga kaso sa Covid sa Hunyo ug Hulyo.
Si Montejo sakop sa Philippine National Police Academy (PNPA) Tagapagbuklod class of 1989.
Sa wa pa nadestino si Montejo sa PRO 7, siya ang kanhi hepe sa Quezon City Police District (QCPD) sa Metro Manila.
Di na lisod alang kang Montejo ang pagdumala sa kapulisan sa Central Visayas sanglit nadestino na siya kaniadto dinhi sa dekada 90.
Matod niya nga lumad sila nga taga dakbayan sa Talisay, apan nibalhin sila sa Malabalay City sa probinsya sa Bukidnon sa edad nga 9 anyos ug didto mitiwas sa iyang pagtungha sa elementary ug high school.
Nibalik siya sa siyudad sa Sugbo aron motungha sa kursong engineering sa University of San Jose Recoletos sa kursong Bachelor of Science of Civil Engineering.
Nisulod siya sa PNPA ug natapos niadtong 1989. Nadestino dayon siya isip hepe sa San Franciso police station sa mga Isla sa Camotes lakip na sa Catmon ug Sogod sa probinsya sa Sugbo.
Nahimo usab siyang commanding officer sa Provincial Mobile Force Company nga nag base sa siyudad sa Toledo ug Regional Engineer sa PRO 7.