NAGSUGOD na kagahapong adlawa sa Davao City ug bisan sa mga kasikbit nga rehiyon ug sa mga lugar sa Pilipinas ang Aggressive Community Testing (ACT).
Gihimo kini isip tubag sa nagkataas nga kaso sa Coronavirus Disease (Covid-19) diin sa Davao City nga kasagaran anaa sa top 5 sa mga siyudad ug probinsya nga dunay taas nga kaso, nagsugod kini kagahapon.
Nasayran nga di tanan ang mopailawom sa testing, kadto lamang mga nailhan nga anaa sa rekord sa health department nga nakasalamuha sa nag-positive sa kagaw, ug ang ilang mga direktang igkita ug ang kakita sa nauna.
Anaa sa 10,000 ka mga indibiduwal sa rehiyon ang punting nga ma-swab test sa Department of Health (DOH) Davao Region.
Ang ACT, sumala kang Health Undersecretary Dr. Abdullah Dumama Jr., mao ang rapid and intensive Covid-19 testing nga tumong ang mabatokan gilayon ang pagkuyanap sa makapamatay nga kagaw.
Kagahapong adlawa, Disyembre 1, gihimo ang ACT sa Shanghai Gym alang sa Talomo Central; ug Toril A Health Center alang sa Toril A ug B.
Ugmang adlawa, Disyembre 2, ang testing himuon sa Central Park Gym alang sa Talomo; SIR Phase 2 Gym alang sa Talomo North; Bankerohan Gym alang sa District A.
Sa Disyembre 3, ugma ang testing himuon sa Buhangin Proper Gym alang sa Buhangin; El Rio Phase 1 Gym alang sa District B; Mintal Gym alang sa Tugbok; ug Barangay Ilang Gym alang sa Bunawan.
Sa maong hitabo daghan ang dili mosugot nga magpa-swab test kay giingon nga bisan giubo ug gisip-on lang ka nga usa lamang ka natural nga flu, mag-positive ka sa Covid.
Dalhon dayon sa isolation facility ang pasyente ug sa tan-aw sa kadaghanan basin didto na hinuon sila matakdan og tumang balatian sa ilang mga kauban nga severe ang sitwasyon.
Sa laktud, di kahadlokan ang swab test, inay mopailawom niini aron ang simple nga flu di na molala pa, nga mao karon ang hinungdan sa paspas nga local transmission.
Motuman kita sa mga mandu sa gobyerno, di kita angay mahadlok kay mas taas ang porsiyento sa mga nangaayo sa Covid-19.