GITUGTAN sa lokal nga panggamhanan ang pagpahigayon og Simbang Gabi o Misa de Gallo gikan sa Disyembre 16 hangtud 24, 2020 sa Katolikong simbahan taliwala sa gipatuman nga general community quarantine sa dakbayan sa Davao.
Apan giklaro ni Mayor Sara Duterte-Carpio atol sa paghinabi kaniya sa 87.5 FM Davao City Disaster Radio nga di mausab ang gipatuman nga curfew hours nga magsugod sa alas 9 sa gabii hangtud sa alas 4 sa kaadlawon.
Gibutyag sa mayor nga sa niaging panag-istorya nila sa pamunoan sa Simbahang Katoliko niadtong Oktubre 15, 2020, gitakda ang Simbang Gabi sa alas 5:30 sa kaadlawon samtang ang Disyembre 24 ug 31 nga midnight mass gitakda sa alas 7:30 sa gabii. Kon diin sa maong panahon, napailawom pa kita sa modified general community quarantine (MGCQ).
Apan nagtuo ang mayor nga dunay mahitabong adjustment sa simbahan sa mga oras sa misa alang sa maong panahon tungod kay nausab na man ang curfew hours ubos sa GCQ kon diin na-classify ang siyudad sa Davao.
Sa pikas bahin, giklaro sab sa mayor nga tanang mando nga ipatuman may kabahin sa pagpakgang sa pagkuyanap sa coronavirus disease (Covid-19) magsubay gyud sa Omnibus guidelines sa Inter-Agency Task Force of Covid-19.
Kini isip tubag sa pangutana nga gipadangat ngadto sa mayor atol sa paghinabi kaniya sa radyo kagahapon sa udto, Martes, kon duna bay gahum ang barangay kapitan nga mopagawas og mando nga di subay sa IATF guidelines, ilabi na gyud sa relihiyusong kalihukan.
Gibutyag sa mayor nga ang pinakaulahing guidelines nga gisubay sa lokal nga panggamhanan nga mao sab ang basehan sa paggama niini og executive order mao kadtong Nobyembre 19, 2020, ubos sa classification nga GCQ mao ang Section 4, Number 12.
"The religious gatherings in areas under GCQ shall be allowed up to 30% of the sitting capacity," pagkutlo sa mayor sa maong guidelines.
Nagpasabot nga tanang mga relihiyusong misa ug pag-ampo gitugtan matag adlaw basta tumanon lang ang 30% capacity sa motambong ug ang pag-obserba sa social distancing. (WGM)