DAVAO DEL SUR -- Gilusad sa mga sakop sa Revitalized Pulis sa Barangay (RPSB) ang programang "Titser kung Pulis" ilawom sa superbisyon sa Davao del Sur Police Provincial Office (DSPPO).
Ang mga sakop sa RPSB nga lisensyado sa pagka-magtutudlo ang mopahigayon og modular class sa mga tinun-ang sakop sa Indigenous People's (IPs).
Gihulagway nga senemana ang paghimo og tutorial classes sa maong grupo ug target niini ang mga tinun-an nga naglisod sa ilang modular lessons.
Ang programa gisugdan didto sa Kalahi Building Proposed School sa Barangay Abnate sa lungsod sa Kiblawan ug ilusad sab sa mga Sitio diin anaa ang mga IP nga tinun-an.
Dako ang pasalamat sa Department of Education South District ngadto sa RPSB human nakahuna-huna sa maong programa sanglit dako kini og ikatabang sa mga batang IPs aron nga madasig sa ilang pagtuon.
Samtang, sumala sa RPSB nga kabahin kini sa ilang tinguha nga makabaton og saktong edukasyon ang mga kabataan sa kabukiran ug di malinla sa mga rebeldeng komunista nga wa'y laing tinguha kundi ang paguba sa kaugmaon sa mga kabataan. (Orlando B. Dinoy)