TACURONG CITY -- Gikapoy, gipanggutom ug gusto na nga manginabuhi nga magmalinawon ang hinungdan sa pagbalik sa sabakan sa balaod sa pito ka miyembro sa New People's Army (NPA) alas 2:30 sa hapon, Lunes, Nobyembre 30 didto sa probinsya sa Sultan Kudarat.
Giila ang mga rebelde nga sila Bryan Berallo Bransuela ug Julito Blag, mga molupyo sa Barangay Kuden, Senator Ninoy Aquino, Sultan Kudarat, lakip sila Joseph Manguda ug Justie Mayao, nga taga Sitio Tudi, Barangay Legodon, Esperanza Sultan Kudarat nga mga sakop sa East Daguma Front-Far South Mindanao Region (EDF-FSMR) sa NPA.
Misurender sab sila Joselito Kantem, Bebeng Dimaog ug Daniel Policia mga molupyo sa Senator Ninoy Aquino nga mga miyembro sa Larangan Guerilla Unit 3 sa EDF-FMSR.
Gi-surender sa mga rebelde ang usa ka M-14 rifle, Garand rifle, M1 Carbine rifle, duha M1 Carbine sniper rifles, Garand rifle, usa ka kalibre .45 na pistola, mga bala, mga magazine ug usa ka .357-magnum revolver.
Mitahan ang mga rebelde sa ilang kaugalingon sa 601st Brigade Philippine Army ug sa mga lokal opisyal.
Gikanayon ni 6th Infantry (Kampilan) Division Chief og Joint Task Force Central Commander Major/General Juvymax Uy nga abri ang ilang ganghaan sa mga NPA ug sa mga Armed Lawless Groups (ALGs) nga gusto nga musurender ug magbag-o sa ilang kinabuhi uban ang ilang mga mahal nga pamilya.
Makadawat og hinabang ang mga rebelde ilawom sa Enhanced Comprehensive Local Integration Program sa gobyerno. (Edgar Fuerzas)