PAMPANGA

Garcia: Ding Mangalagu't Maslag a Parul ning Kapampangan (Beautiful and Bright Lanterns of Pampanga)

Kapisik

"TULA king labwad! Dintang ne ing Ginu.

Tanggapan ne sana ning yatu ing Ginu na

Bustan balang pusu pagadya neng silid

Layun ding Nwan at angeles magdalit la

Tula king labwad, ing Talapangabus magari ya

Bustan lang ding dalit ding Nwan magamit la

Kabang ding dayatan at albug, batu libis at kapatagan

Ulitan da ing mamaksing a tula,

Ulitan da ing mamaksing a tula,

Ulitan da ing mamaksing a tula,

Ulitan da ing mamaksing a tula!

Tual king labwad ating katuwan at kalam

at busatn a patunayan ding bangsa

ing ligaya ning katalarwan Na

at kapagmulalan ning Keyang lugud,

at kapagmulalan ning Keyang lugud,

at kapagmulalan, at kapagmulalan ning Keyang lugud!"

-- Mapilang Sunis ning "Tula king Labwad", Dalit Pamasku (Some verses from "Joy to the World", A Christmas Carol)

***

Keti Lalawigan Kapampangan mamangawa la ngan parul deng kabalen tamu bang pagmasusyan ing Kayaldawan ning Pasku o ing aldobeytan ning Ginung Yesukristu. Ing parul yang tanda ning kapabalwan a daratang ne ing Talapangabus at ing panyatang na sukat pagmasusyan tamu anting talatuki Na o anting Kristyanu.

Bista man balang balen keti Kapampangan-subali pa kareng aliwang balen ning kekatamung bangsa-mamangawa la o sasali la ngan ding memalen parul da para karing sari-sarili dang bale -- ing Sampernandu (San Fernando) yang maninuma king pamangawa karing sari karagul at asna katimways aslag a parul.

Deng mangawang parul Sampernandu sing karagul, singka-makule, singka-santing at singkaslag la. Iti megi nang senayan banwa-banwa at pasanting no't pasanting, paragul no't paragul, pakule no't pakule at paslag no't paslag ding pamangawan dang parul inya sa't pati ligligan parul paragul nang paragul at pabantug nang pabantug e mu mabilug a Pilipinas nung e pati na aliwang bangwa mabilug a yatu. Pati na galal a salapi paragul nang paragul at parakal nang parakal.

Inya sa't mibansagan yang Christmas Capital of the Philippines ing lalawigan tamu pauli ding mangalagung parul tamu. Pati deng mamanyaling parul tamu mamandakal la banwa-banwa inya sa't pati magtinda darakal la lakwas na kareng mangaragul a dalan antimo ing king inter (intersection tagana dapot kukuyad de reng kabalen) a mamutaktak parul agyang pilan pang bulan at pati na kayari ning Pasku. Deng manyali daranun da ing pamanyali da inya pin pati deng para king tutuking banwa sasali na la inya in mu naman atin pang mamisali kayari ning Pasku.

Metung la karing tune apagmaragul tamu anting Kapampangan deng Parul Sampernandu.

***

Dake Talabaldugan:

1. malabasan (palagyu) uri ning ubingan a apapagkamalyang pirasung basan nung makalukung ya katawan. English - masses, assembly, multitude, crowd, group, mob, throng, barrage, gathering. Alimbawa king pamangamit: "Memulandit la ngan deng mamyalung a anak inyang atuklu ne ning metung ing malabasan keng mula."

2. malábit (panguri) masita, madaldal, parating magsalita, makatak; kukupak mung kukupak a balungus; mapag-indredus; makaba dila. English - talkative, chatty, loquacious, babbling. gossiping, gibbering, blathering, voluble, garrulous; glib, eloquent, blabby, gabby, motormouthed, mouthy. Alimbawa king pamangamit: "Memulandit la ngan deng mamyalung a anak inyang atuklu ne ning metung ing malabasan keng mula."

3. malabóng (panguri) malabung, marakal, makapal bulung o makaba na bwak. English - thick, dense, heavy, crowded, impenetrable, jungly, substantial. Alimbawa king pamangamit: "Buri dang buri ing maggulunggulung deng anak a mamyalung keng malabung a dikut."

4. malák (panguri) inge, lakwas na ning bingut a masipun gulunggulungan. English - unusual sound in the throat caused by phlegm or mucus. Alimbawa king pamangamit: "Malak yang matudtud i Elang uli kanung mikarimla ya neng tinipa deng maranun at ala yang susulud a takuku."

5. malamlam (panguri) malungkut mata o pamaglalawe pauli ning pamangayna lub. English - eyes or face that are sad, sorrowful, depressed, downcast, miserable, despondent, despairing, downhearted, dejected, disconsolate, somber, bitter, doldrums, melancholy. Alimbawa king pamangamit: "Bagya-bagya yang menik keng silid na i Ikang at malamlam ya matang dintang pauli na kanu ning mebating nang bakal inya e na asali ing gamit da keng pipagaralan para bukas."

***

Sadyang gawi da reng Kapampangan

Deng kalalakyan inyang minuna asno kabyasang gawang parul a makule, gagalo at bala ating sine. Atin la pang makuyad a kwentu inya bala makuyad lang sine o deng gif ngeni. Mura mu ing gastus da keng pamangawang parul. Kwayan, papel de apon, pamakat a gawa keng malabno almirul o gogo linutu bang maging pamakat, leting, kawad, gunting at malating lasetas.

Manyad la mu kanita kareng ating tanam a kwayan karetang mura bang saguli lang batakan o bayutukan. Gagawa lang payat a taiktik at ila ring gagamitan dang pambalangkas keng parul. Piyabtas-abtas at pitali-tali da la reng taiktik at kaybat nita maske ne ing batwin o nung nanu mang aske ing buri dang palto keng parul da.

Deng ating kwentu o mala-sine parul gagamitanan da lang karayum bang karin ya ing sandirit o pekapidurutan ning parul at karin ating miyayaliwang aske-asan, ayup, bulaklak, tulang, talubang at miyayaliwa pang malyaring ipalage bang potang dudurut ya ing pekapapalage mayakit la reti kabang aslagan na la ning malating sulugi keng gulut da.

Ala nang unabis kareti ngeni agnan ning pangabating da na ring mangraul a burarul o aswan dang guryun-sadyang gawing ala na ngeni keti Kapampangan.

***

PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan-ding keyang dalit, kawatasan, amlat at miyayaliwang kapaglalangan.

PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph