BISAN kon toa nidangop sa National Bureau of Investigation (NBI) 7 ang banay ni manlalaban Joey Luis Wee, ang Cebu City Police Office (CCPO) nisaad nga ilang sulbaron ang krimen.
Matod ni Police Lieutenant Colonel Clark Arriola, information officer sa CCPO, nga ilang gipasalig sa pamilya nga ang kapulisan mopalawom sa imbestigasyon. Giangkon ni Arriola nga blangko pa sila sa motibo ug anggulo sa insidente tungod kay di pa kompleto ang ilang mga nakuhang ebedensya.
Gipangsubay pa nila ang mga kuha sa CCTV camera sa mga silingang establisemento aron madugtong nila sa posibling pag-ila sa killers.
Nihulma ang CCPO og special investigation task group (SITG) nga pangulohan sa Mabolo police station, City Investigation and Detective Management Branch, Criminal Investigation and Detection Group 7, Regional Intelligence Division 7 ug ang Regional Anti-Cyber Crime Unit. (AYB)