SUPERBALITA CEBU

Diputado: Kanus-a pa kaha moumento?

Daghan ang nagtuo nga kon dunay laing grupo nga mag-operate og telco unya mo-kompetensiya sa Smart ug Globe, adunay pag-umento o improvement ang pamatigayon sa Smart ug Globe.

Apan sa nahitabo karon, wa may umento sa ilang mga serbisyo. Mao ra man gihapon. Dugay moabot ang text messages, mag walawala ang signal, hinay ang signal.

Ug ang nakaparat sa tanan, padayon gihapon ang kalit nga pagka-hanaw sa load.

* * *

Mao kini hinungdan nga daghan ang nangandoy nga unta, mosugod na pag-operate ang Dito, ang gitawag og 3rd player nga maoy mo-kompetinsiya sa Smart ug Globe.

Apan sa nahitabo karon, morag madugaydugay pa tingali nga makasugod ang Dito.

Padayon pa ang ilang pagtukod sa mga transmission towers.

* * *

Dunay akong amiga nga hilabihan nakangisi sa dihang nagkita mi. Iya kong gihaylo nga moapil sa iyang racket.

Unsa man, ako siyang gipangutana.

Ahente kuno siya sa contractor og transmission tower sa Dito. Nindot kaayo ang ilang gi-offer nga package para sa mga tag-iya og yuta nga mopaabang niini aron tukoran sa tower. Labi na gyod kon husto sa dokumento. Nangutana ko sa detalye kay naikag ko sa iyang gisulti.

Wa magdugay, milakaw siya kay mag-meeting kuno sila nga mga ahente sa contractor.

Sa akong nadungog gikan kaniya, makalingaw gyod tuod ang package.

* * *

Sa dihang nagkita mi og usab, morag biyernes santo ang iyang nawong og huyhoy ang iyang mga abaga. Kumusta atong racket, ako siyang giunhan.

Way kalaki oi, matod pa niya.

Wa na modawat ang contractor sa akong mga offer, hasta pod ang gikan sa akong mga kaubang ahente.

Ngano man, nangutana ko.

Ang mga mayor ug mga politiko na karon ang nag-handle sa maong racket. Sila na ang mo-recommend kon kinsa nga yuta o asa nga yuta ang tukoran sa tower. Pasabot, sila na ang nag-control sa racket, patapos nga sulti sa akong amega dayong lakaw.

Tinuod ba kini?

* * *

Tulo ka amigo ang akong naka-storya kagahapon. Silang tulo pulos naigo sa Covid.

Ang usa, mayor sa usa ka siyudad. Ang duha, mga empleyado sa maong siyudad.

Samtang nag-istoryahanay mi, ang mayor nagsul-ob og mask ug face shield. Duna pa gyod nagbabag nga bildo aron pagseguro nga di gyod makaabot kaniya ang laway o gininhawa sa iyang kasulti.

Naneguro lang ko, Attorney, kay dili lalim kon maigo na ka sa Covid. Gisultian ko sa akong doktor nga kon maigo pa ko og usab, hayan mamatay na gyod ko.

Gawas sa mask ug face shield, nagsul-ob pa gyod siya og jacket nga susama sa PPE.

Nganong nag-jacket pa man ka, Mayor, akong pangutana.

Paneguro gihapon kay basin dunay makaduol nako unya mosaghid iyang bukton nako, lisod na, matod pa niya.

Gani, dugang pa niya, ingon ani gihapon ko sa among balay, mask ug face shield bisan akong asawa ug mga anak ang akong ka-storya. Bisan gani akong asawa, mag mask bisan matulog.

Susmariosep.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!