TAN-AWA, miubos pagbalik ang kaso sa Covid-19 sa Cebu City human hugot nga gipatuman ang estriktong health protocol.
Kon wa gihimo ni Cebu City Mayor Edgar Labella ang kamandoan sa estriktong polisiya sama sa border sa Cebu City ug Cebu province, dili mahitabo nga moubos pagbalik ang kaso.
Sa miaging adlaw, dunay duha ka kaso sa Covid-19 sa Cebu City. Ikompara sa 59 ug kapin sa 20 ka mga kaso sa dihang wa gibalik ang pag-estrikto sa border ug health protocol sa siyudad.
Kini magpadayon na unta aron hingpit na natong maangkon nga makabuylo ang ekonomiya ug makabalik nasab sa ilang trabaho ang nawagtangan.
Kon isyu na sa pagbatok sa kampanya sa Covid-19, wa may nahimong sayop si Labella.
ANAK SA KONGRESISTA
Wa man magpanuko sa pag-angkon si Congresswoman Eufemia Cullamat nga sakop sa New Peoples Army kun NPA ang iyang anak.
Si Jevilyn Cullamat napatay sa engkuwentro sa militar batok sa NPA didto sa Surigao.
Matod sa kongresista, ang iyang anak nisud sa NPA tungod sa pangabuso sa militar ngadto sa lumad.
Wa man koy nadawat nga report sa pangabuso sa militar karong mga panahuna ubos sa modernong teknolohiya.
Morag ang pasabot sa kongresista ang abusado sa militar niadto pang miaging mga dekada ug dili karon?
SUROY SUROY
Nag-viral sa social media ang panagtapok sa mga tawo sa pag-abot sa mga partisipante sa Suroy Suroy Sugbo didto sa lungsod sa Madridejos nga wa mag distancing ang mga tawo.
Gibirahan sa mga tawo sa social media sila si Gobernador Gwen Garcia, MalacaƱang Spokesman Harry Roque, Opav Secretary Michael Dino.
Kuyog sa mga dagkong opisyal ang mga kandidata sa Binibining Pilipinas Universe.
Sila si Garcia, Roque, Dino ug mga kauban nituman sa health protocol. Apan ang mga tawo nga nitan-aw wa may distancing.
Tan-awon nato og makadulot ba ang gihimong imbistigasyon sa DILG sa maong kontrobersiya. Email: efrenlonzon71@gmail.com Text: 09235562777