SUPERBALITA CEBU

2 ka durugista napatay; 2 ka kilo shabu nakuha

KAPIN sa duha ka kilo sa gituohang shabu ang nakuha sa kapulisan gikan sa duha ka gikatahapang mga durugista nga napatay atol sa pinusilay sa gabii sa Disyembre 1, 2020 sa Cebu South Coastal Road sa habig sa Barangay Mambaling, Dakbayan sa Sugbo.

Ang drugas nagbalor og P13.9 milyunes base sa Dangerous Drugs Board (DDB) value.

Ang mga suspek nga napatay sa hiniusang operasyon sa Regional Drug Enforcement Unit (RDEU) 7, Police Drug Enforcement Unit (PDEG) Visayas ug Philippine Drug Enforcement Agency (PDEA) 7, mao sila si Arniel Degulacion, 42, ug Michael Johnlery Olid, 29, puro mga taga San Antonio Village, Barangay Talamban, Dakbayan sa Sugbo.

Si Police Lieutenant Colonel Benedict Poblete, pangu sa RDEU 7, nangu sa buy-bust, niingon nga ilang gipalitan sila si Degulacion og 50 gramos sa shabu balor og P340,000.

Matod ni Poblete nga dihang nakabantay ang duha nga mga pulis ang ilang kasabot, nanibat kini sakay sa Suzuki Ertiga ni Olid.

Sa gukdanay, naabot sa dead end nga karsada ang duha, hinungdan nga nanganaug sa sakyanan.

Matod ni Poblete nga usa sa duha ninglanit sa armas hinungdan nga ilang giunhan pagpusil.

“It is a legit operation, Hindi naman tayo gusto na maunahan tayo nitong mga durugista na eto. Inunahan na natin pero mayroon talagang nakapa putok nang baril. Yon nga lang naunahan yong dalawa sa ating tropa,” pasabot ni Poblete.

Nasayran sa Superbalita Cebu nga sila si Degulacion ug Olid mga batos sa drug lord nga si Ronald Aparecio Natividad, alyas Dodong Toldo, kombiktadto sa drugas ug kasamtangan nga napriso sa Zamboanga Penal Colony.

Ang duha mao usab ang nipuli kang Gilbert Lumanog, kinsa nadakpan sa City Intelligence Branch sa Lapu-lapu City sa usa ka bu-bust sa Barangay Suba Basbas sa milabay nga buwan.

Mokabat sa 22 kilo nga shabu ang nasakmit sa buy-bust kang Lumanog.

Sa intelligence monitoring sa Regional Intelligence Division (RID)-7, ang duha nga namatay suod nga mga higala ni Dave Kelleher Natividad, anak ni Ronald, kasamtangang napriso karon sa Mandaue City Jail. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph