COTABATO CITY -- Patay ang giingong suspek sa pagpamomba sa gilusad nga "Oplan Paglalansag Omega" sa Criminal Investigation and Detection Group (CIDG) sa Bangsamoro Autonomous Region in Muslim Mindanao (Barmm) alas 1:15 sa kaadlawon, Miyerkules, Nobyembre 2, sa siyudad.
Nailhan ang suspek nga si Abraham Abad Abdulrahman alyas Abu Suffian, miyembro sa Dawlah Islamiyah Terror Group nga gipangulohan ni Shiek Esmail Abdulmalik alyas Kumander Abo Toraife sa Bangsamoro Islamic Freedom Fighters (BIFF)-Isis-inspired group.
Matud ni CIDG Assistant Regional Director Major Esmail Madin nga gironda nila ang gipuy-an sa duruha didto sa Barangay Bagua 2, Cotabato City, kinsa giingong suspek sa pagpamomba sa Southseas Mall niadtong 2018.
Sa diha nga gisulod sa mga awtoridad ang balay ni Abdulrahman dala ang search warrant gikan sa korte, kalit kining nagpabuto sa iyang armas.
Napugos ang mga pulis nga pusilon ang suspek nga maoy, hinungdan sa iyang kamatayon human makaangkon og upat ka samad sa lawas.
Samtang nakaipsot ang kauban ni Abulrahman nga si Jasmiya Camsa Ibrahim.
Narekober gikan sa posisyon sa suspek ang usa ka kalibre .45 nga pistola, magazine, mga bala, usa ka granada ug mga kagamitan sa paggama og mga improvised explosive devices (IEDs).
Gikanayon ni Major Madin nga kauban si Abdulrahman sa mga nagplano sa pagbomba sa Southseas Mall ug Marawi City siege.
Nagbansay ang suspek sa paggama og bomba uban ang grupo ni Kumander Abo Toraife sa Barangay Butril, Palimbang, Sultan Kudarat.
Apan gihimakak sa asawa nga si Marifa Sarento nga nalambigit sa pagpamomba ang iyang bana kay payong-payong drayber lang kini. Hustisya ang gisinggit sa asawa sa gidangatan sa bana. (Edgar E. Fuerzas)