KIBLAWAN, Davao del Sur -- Natuldokan ra gyud ang suliran sa mga lumad alang sa limpyo'ng tubig human matunol na ngadto kanila ang ang proyektong patubig didto sa Barangay Kimlawis.
Gawas sa patubig, gipahimoan sab sila sa mga sakop sa Revitalized Pulis sa Barangay (RPSB) og komon nga kasilyas diin adunay tag duha ka toilet bowl sa mga sitio sa Mahi 1 ug Mahi 2.
Mokabat sa 2,300 metros nga hus ang gibutang sa kapulisan diin nahimo ang proyekto pinaagi sa "bayanihan," kauban ang mga molupyo sa nahisgutang lugar.
Dako ang pasalamat sa RPSB human gi-ayudahan sila sa kagamhanang probinsiyal ug lokal nga gobyerno sa maong lugar.
Gikanayon nga una nang nag-amot-amot ang RPSB aron mahatag ang proyekto ngadto sa mga lumad nga dugay nang naglisud sa tinubdan sa limpyo'ng tubig alang sa pag-inom.
Gibutyag ni Lieutenant Joselito Cortes, pamuno sa RPSB Team Kimlawis, nga kini ang pasiunang gasa pa lang nila isip pinaskuhan ngadto sa mga molupyo sa lugar.
Samtang gihangop ni Mayor Carl Jason Rama ang proyekto diin dakong tabang alang sa mga sakop sa tribung B'laan.
Naglaum ang mayor nga dako kini nga tabang sa pag-uswag sa kampanya sa gobyerno nga "End Local Communist Atrocities Campaign," ilabi na sa mga hilit nga dapit sa lungsod. (Orlando B. Dinoy)