BISAN pa man sa iyang taas nga nakab-ot sa natad sa basketball, ang Sugbuanong higante nga si June Mar Fajardo nagpabiling mapaubsanon.
Makita sa YouTube page sa six-time PBA Most Valuable Player (MVP) ang yanong kinabuhi niini sa iyang bag-uhay nga pag-uli sa ilaha sa Pinamungajan, Probinsiya sa Sugbo.
Sa iyang YouTube account AhosGaming, makita si Fajardo nga nag-bike sa ilang lugar gamit kauban ang iyang mga higala.
Makita ang pagkamatinahuron ni Fajardo kay mo-greet kini’g maayong adlaw sa iyang mga gikasugat.
Aduna sab usa ka video nga misuroy siya sa yano nga basketbolan nga adunay kahoy nga basketball board.
Ang 6’9” nga si Fajardo nagsugod sa iyang basketball career dinhi sa Cebu sa wala pa siya ma-draft sa Petron Blaze Booster (San Miguel Beermen franchise) isip No. 1 pick niadtong 2012 PBA Rookie Draft.
Sa wala pa nisulod sa PBA ug niduwa sa Asean Basketball League (ABL), gibaid ni Fajardo ang iyang kahanas ubos sa University of Cebu (UC) Webmasters sa Cebu Schools Athletic Foundation Inc. (Cesafi).
Sa iyang pagsulod sa PBA dali ra nakakulit og pangalan si Fajardo kay nadala niya sa kampiyonato ang San Miguel Beermen sulod sa lima ka sunodsunod nga mga edisyon sa Philippine Cup sa 2014-2019.
Sa iyang walo ka mga tuig sa PBA, nakabulsa na og walo ka mga kampiyunato si Fajardo. Siya pud ang naghupot sa rekord nga labing unang player nga midaog sa Most Valuable Player award sulod sa unom ka sunodsunod nga seasons.
Nahimo pud si Fajardo nga 3-time Finals MVP ug 8-time PBA Best Player of the Conference.
Lakip sa iyang mga nadaog mao ang 6-Time PBA First Mythical Team, 5-time PBA All Defensive Team, PBA All-Rookie Team, 2015 PBA Defensive Player of the Year, PBA Most Improved Player ug 2-Time PBA Sportsmanship Award.
Wala makaduwa si Fajardo sa PBA Philippine Cup “bubble” sa Angeles, Pampanga kay nagpaalim kini sa iyahang shin injury.
Pakyas ang San Miguel sa pagdepensa sa ilang Philippine Cup title human sila gi-eliminate sa Meralco Bolts sa quarterfinals.
Ang Barangay Ginebra San Miguel ug TNT Tropang Giga mao ang gaduwa sa Philippine Cup Finals. (RSC)