Miretiro si American Floyd Mayweather Jr. nga wala’y pilde sulod sa 50 ka mga away, nagpasabot nga wala kini nakatilaw og knockout.
Apan adunay usa ka insidente nga nakatilaw siya og knockdown, debatihunon man tuod apan opisyal kining natali nga knockdown gumikan kay giiphan man siya sa referee.
Nahitabo kini niadtong 2001 sa 6th round sa away nila ni Mayweather ug Carlos Hernandez.
Niadtong higayuna, nagbinaloay og kumo ang duha ka mga boksidor apan bisan wala siya maigo, si Mayweather kalit lang miduko ug natukod niya ang iyang wa nga kumo sa sawog.
Gipasabot ni Mayweather ang referee nga naa lang siya’y gipamati sa iyang kamot maong niduko siya apan giiphan lang gihapon siya sa referee.
Nagpadayon ang away ug midaog si Mayweather pinaagi sa unanimous decision aron depensaan ang iyang World Boxing Council (WBC) super featherweight title.
Kon buot hunahunaon, mao kini ang bugtong buling sa limpiyong rekord ni Mayweather. (ESL)