AG DOREEN B. PALOMARES
Santa Fe, Cebu
Dihang mihigda ko
miagiik ang gubaong katre
dungan sa pagbunok sa uwan.
Napusgay ang usa ka lusok uwan
diri sa akong bukton dungan
sa maulawon nga kahayag sa buwan
nga milusot sa buslot sa atop.
Mibarog ko ug gibira ang katre
paingon sa pikas habig
ug mihigda pagbalik.
Ang linugasak sa uwan sa atop
samag yawyaw sa nag-inusarang unlan
sa akong tupad nga dugay nang gibiyaan
sa mga malipayong gabii niini.
Ug bugtong ang nagpabiling baho
mo na lang ang kanunayng mopainit
sa akong mga gabii.